Feijóo dá marcha atrás, non abrirá as garderías, e critica ao Goberno central por non ter un protocolo

O presidente da Xunta, Alberto Núñez Feijóo, deu, finalmente, marcha atrás na súa idea de reabrir as garderías, como anunciara hai un mes e confirmou que as escolas infantís de entre 0 e 3 anos non reabrirán ata o curso que vén --do mesmo xeito que os centros de día e ocupacionais--.  E para paliar esta decisión, anunciou unh paquete de medidas de conciliación dotado de 40 millóns de euros.

Hai un mes, o presidente galego criticaba duramente ao goberno por permitir a apertura das garderías e deixar en mans dos pais esa decisión e anunciaba a súa intención de abrilas en Galicia. Pero, tras consultar os expertos, o presidente galego deu marcha atrás na súa decisión. Con todo, e preguntado por Galicia Confidencial, se non considera que se equivocou, botou balóns fóra e volveu criticar ao goberno central por non ter regulado esta materia que depende dos gobernos autonómicos.

Con todo, e para paliar os efectos desta marcha atrás e favorecer a "reincorporación" dos pais aos seus empregos tras o pico da pandemia, o xefe do Executivo anunciou un paquete de medidas de conciliación dotado de 40 millóns de euros. Este paquete inclúe un 'bono coidado' extraordinario que a Xunta aspira a que chegue a 36.000 familias e que permitirá contar cunha axuda mensual de 500 euros ata que en setembro reábranse os centros. Entre os requisitos para acceder ao mesmo, os proxenitores deberán traballar fóra de casa e os ingresos non poderán superar os 806 euros por cada membro da unidade familiar.

MESMOS ARGUMENTOS QUE O GOBERNO CENTRAL

Feijóo xustificou a súa medida tras consultar coa comunidade pediátrica e médica. e dixo que "había discrepancias entre os pediatras" e a que é "imposible" manter a distancia física nestes colectivos, polo que habería máis riscos na apertura. Os mesmos argumentos que utilizou o Goberno central no seu día para non reabrir as garderías.

"O que critiquei é que non houbera protocolos. Que si houbera para bares, terrazas, actividades deportivas, mobilidade e non un protocolo para todo o sistema educativo", dixo en resposta a Galicia Confidencial. Con todo, as competencias educativas son das comunidades autóonomos.

"Non estivemos acertados como país cando non quixemos establecer procolos educativos e agora entendemos que ante a dúbida, o mellor é a prudencia", xustificou a súa marcha atrás que tentou ocultar cun novo paquete de axudas.