As rebaixas da covid: menos compras mentres aumentan os ERE
Descontos e promocións adiantáronse máis que ningún outro ano debido ao excedente de existencias pola crise da covid.
Por Europa Press / Redacción | SANTIAGO DE COMPOSTELA | 06/01/2021 | Actualizada ás 15:01
Entre 40 e 60 euros. Iso é o que baixará, de media, o gasto dos galegos este 2021 nas rebaixas de inverno en relación coas do ano pasado, segundo os cálculos da federación galega de comercio.
Descontos e promocións adiantáronse esta tempada máis que ningunha outra debido ao excedente de existencias nos comercios pola crise da covid-19, que obrigou a pechar as tendas durante o primeiro confinamento e despois impuxo restricións aos aforamentos e á mobilidade.
En declaracións a Europa Press, o presidente da federación de comercio en Galicia, José María Seijas, apunta ás enquisas que auguran un consumo de entre 190 e 200 euros por galego durante estas rebaixas de inverno, que tradicionalmente comezan o 7 de xaneiro. É "bastante menos que nas rebaixas anteriores", destaca, en referencia a esa caída de entre 40 e 60 euros de media no orzamento de cada consumidor.
Seijas xa vén advertindo nas últimas semanas do retraimiento do consumo nas compras do Nadal, debido á "incerteza" pola pandemia, aparellada aos expedientes de regulación de emprego temporais (ERTE) e ao paro.
Os últimos datos que manexa, relativos a novembro, sitúan a diminución das compras no 5,8% e as previsións para as rebaixas "non cobren as expectativas", polo que "haberá moitos comercios que sufran". "A xente non sabe que vai ocorrer. Hai dúbidas sobre se se manterán os traballos, se seguirán os ERTE... Cando hai esta incerteza as vendas se retraen. E vese, porque o aforro está a subir", expón.
Os descontos, pola súa banda, serán elevados e de feito "xa se observan" do 50%, 60% e ata 70%, segundo indica o responsable dos comerciantes galegos. Neste escenario, avisa de que "o comerciante non pode subsistir porque hai que facer fronte aos gastos" e agora chega o momento de "devolver os préstamos" que se destinaron a afrontar a crise.
MÁIS DE 9.000 CONTRATOS
No relativo á contratación vinculada coas rebaixas, estimacións como a de Adecco sitúan os postos de traballo nesta campaña en máis de 9.000, entre un 5% e un 10% menos en comparación co pasado exercicio.
Por provincias, Pontevedra liderará segundo estes cálculos a campaña galega coa realización de 4.885 contratacións, seguida da Coruña con 3.320 novos contratos. A maior distancia sitúanse Lugo (rozaranse os 490 empregos) e Ourense (case 380 postos de traballo).
