O Parlamento aproba que Meirás sexa cedido á Xunta e dedicar parte do pazo a Pardo Bazán

A Cámara galega deu luz verde á iniciativa do PPdeG que solicita ao Estado a cesión do Pazo de Meirás a mans da Xunta e que o complexo situado en Sada teña entre os seus usos o recoñecemento á figura da escritora Emilia Pardo Bazán.

A proposición non de lei saíu adiante no pleno celebrado este mércores no Pazo do Hórreo. Bastaron os votos do grupo popular, maioritario na Cámara, para a aprobación dun texto que contou coa abstención de PSdeG e BNG, que coincidiron en censurar que os populares traten de "apropiarse" da recuperación do Pazo ata hai un mes en mans dos herdeiros de Francisco Franco tras décadas de "inacción" desde a Xunta.

En concreto, o texto aprobado solicita a cesión á Xunta da xestión do complexo situado en Sada  e que se facilite a compatabilidade de tres usos: recoñecemento da figura de Emilia Pardo Bazán, turísiticos e vinculados á memoria histórica.

Así mesmo, tamén pon sobre a mesa que se impulse desde Meirás o recoñecemento "á loita social, política e insistucional pola súa recuperación" para patrimonio público (culminada en decembro coa execución da sentenza que obrigou á súa devolución ao Estado) Por último, propón a organización no pazo dun "acto de recoñecemento" ás persoas e entidades que ao longo de "o últimas catro décados implicáronse na reivindicación da devolución" de Meirás.

Durante o debate, o portavoz parlamentario do PPdeG, Pedro Puy, apelou a trasladar ao Parlamento o "consenso" que, di, existe na sociedade galega sobre a recuperación do pazo para alcanzar un "acordo de mínimos" na posta en marcha dos novos usos do complexo.

Luís Bará (BNG), que quixo dar a "benvida" ao PP ao "recoñecemento" ás persoas que loitaron desde o fin da ditadura por recuperar Meirás, tachou de "conversos" aos pouplares "que insultaron por demandar a devolución" do pazo "e agora atribúense os méritos".

O expresado polo BNG vai na liña da postura expresada polo Grupo Socialista, quen da man de Pablo Arangüena, destacou que Pardo Bazán "merece todos os usos e recoocimiento" pero a súa "memoria xa está fomentada e protexida, a diferenza da memoria histórica".

"Usan a coartada de Pardo Bazán para diluír a memoria histórica democrática, á que dedican cero euros nos seus orzamentos", engadiu Arangüena, quen, do mesmo xeito que Bará, botou en cara os "convenios" da Xunta coa Fundación Francisco Franco.

Na súa quenda de peche, Pedro Puy, acusou os grupos da oposición de "usar divisións falsas onde non existen". "Non están por buscar consensos, están por buscar elementos de confrontación co Partido Popular", engadiu.

AUTONOMÍA FINANCEIRA

Doutra banda, tamén no pleno deste mércores, a Cámara aprobou cos votos de PP (grupo propulsor da iniciativa) e BNG e a abstención de PSdeG outra proposición non de lei que insta o Estado a "respectar" a autonomía financeira e a "capacidade normativa" en materia tributaria que se recoñece á Comunidade Autónoma de Galicia na Constitución, Estatuto e as diferentes leis vixentes.

Tamén se demanda que o Estado non adopte medidas "á marxe" do Consello de Política Fiscal e Financeira e a Comisión Mixta de Transferencias entre a Administración central e a autonómica en cuestións que afectana a Galicia. Todo iso en relación a un acordo concreto contra o que expresou a súa oposición o Grupo Popular --tamén da man do seu portavoz na Cámara, Pedro Puy-- e que a iniciativa aprobada solicita anular.