A alcaldesa de Boimorto négase a dimitir malia terse vacinado contra a covid-19 cando non lle tocaba
A oposición quere reprobala e insiste en que deixe o cargo.
Por Europa Press / Redacción | Boimorto | 02/02/2021 | Actualizada ás 19:52
Os representantes de PSOE e BNG en Boimorto esperan resposta a un escrito que rexistraron no que solicitan un pleno extraordinario cun único punto: o da reprobación da alcaldesa, María Jesús Novo, tras vacinarse na residencia municipal a pesar de non formar parte do seu persoal sociosanitario, e a esixencia da súa "inmediata dimisión".
No escrito incídese en que a rexedora se vacinou "sen ser unha das persoas dos grupos declarados prioritarios polas autoridades sanitarias".
PSOE e BNG están á espera das explicacións da rexedora, quen interveu nesta xornada nunha sesión extraordinaria que estaba convocada. Con todo, as fontes municipais consultadas indicaron que a rexedora reivindicou a súa xestión sen maior referencia ao sucedido, e o debate centrouse, como estaba previsto, no plan de obras que afecta á localidade.
Agora, PSOE e BNG esperan a resposta á súa petición de pleno extraordinario, aínda que avanzan que, se non se convoca, aproveitarán a sesión ordinaria prevista para final de mes para expor as súas iniciativas en relación ao sucedido.
FUNCIÓNS DE "XEFA DE PERSOAL"
Socialistas e nacionalistas insisten en que María Jesús Novo, que pediu a baixa do PPdeG, debería dimitir en aras da "exemplaridade". Tamén o portavoz parlamentario do PPdeG, Pedro Puy, defendeu que a rexedora debería renunciar ao seu posto, tras reivindicar a "rapidez" e "firmeza" coa que actuou o seu partido.
En concreto, o PPdeG pedira máis explicacións á alcaldesa tras considerar "insuficientes" as que proporcionou ao transcender a vacinación. Entre tanto, abriulle un expediente disciplinario, pero antes de que este puidese avanzar a propia rexedora solicitou a baixa da formación.
A alcaldesa vacinouse o pasado 28 de decembro, un día despois de que en Santiago se administrase a primeira dose á primeira galega en recibir unha vacina contra a covid-19.
A residencia incluíu o seu nome na listaxe de vacinación, segundo a versión dada a 'elDiario.es', o medio que publicou a información, porque exercía de facto funcións de "xefa de persoal", dado que a residencia é de titularidade municipal, e acudía a diario ao centro, onde prestaba axuda con diversos labores ou realizaba compras.
