A Xunta insiste que a caza do lobo permite xestionar posibles ataques á gandería

A conselleira de Medio Ambiente, Territorio e Vivenda, Ángeles Vázquez, reclamou ao Goberno central que deixe á Xunta "facer xestión" do lobo para poder facer fronte aos posibles ataques deste animal ao gando, xa que, denunciou, coa nova decisión estatal as comunidades autónomas "non poderán facer absolutamente nada" ante esas situacións.

Así se pronunciou a preguntas dos xornalistas, despois de que o pasado xoves a Comisión Estatal de Patrimonio Natural do Ministerio de Transición Ecolóxica e Reto Demográfico, aprobase a inclusión de todas as poboacións de lobo existentes en España na listaxe de especies en réxime de especial protección, polo que automaticamente deixa de ser considerada especie cinexética.

A conselleira lembrou este luns que dentro do Ministerio existe un grupo de traballo do lobo que "leva cinco anos sen reunirse", mentres que foron as comunidades as que fixeron "xestión do lobo, sempre cos axentes ambientais e do territorio".

"Se de algo podemos presumir é que, grazas ás comunidades de Galicia, Asturias, Cantabria e Castela e León, o lobo xa non é unha especie en perigo de extinción, todo o contrario", remarcou, insistindo en que "grazas a esa xestión" hai "mandas importantes, suficientes" e se puido xestionar "un equilibrio na biodiversidade".

Neste ámbito apuntou que "chega un momento" en que teñen que deixar ás comunidades "facer xestión". "Se unha zona sente moi aguilloada e hai moitos ataques de lobo, temos que dispersar ese lobo", recalcou, lembrando que o pasado ano rexistráronse 2.400 cabezas de gando atacadas polo lobo.

"QUEREMOS XESTIONALO"

Así as cousas, aínda que trasladou que a Xunta ten a man tendida para seguir traballando para que esta especie se siga propagando polo país, Vázquez incidiu en que non se pode permitir que, nunha comisión "sen ningún informe nin os 15 días que hai que ter de comunicación, se tomen determinacións en contra das comunidades autónomas".

Na mesma liña, criticou que "sexan outras comunidades as que teñan voto, cando non teñen lobo nin nunca fixeron xestión do lobo". "Aquí non hai ideoloxía, aquí hai xestión: Nós queremos o lobo, pero queremos xestionalo", concluíu.

OPOSICIÓN DE 4 COMUNIDADES

Tras coñecerse a decisión do Ministerio, a Xunta sinalou que tanto Galicia, como Asturias, Cantabria e Castela e León opuxéronse á pretensión do ministerio desde o primeiro momento en que se propuxo o informe do Comité Científico, e fixérono de forma reiterada nos órganos técnicos existentes para chegar aos necesarios consensos: Grupo de Traballo e Comité de Flora e Fauna Silvestre.

Así, indicou que desde os servizos xurídicos do catro Comunidades analizaranse as circunstancias que rodearon esta sesión da Comisión Estatal Sectorial e o propio acordo adoptado, ademais de promover todos os recursos que estean ao seu alcance para impedir unha decisión que consideran que "non ten ningún fundamento técnico nin científico".

A conselleira de Medio Ambiente, Territorio e Vivenda, Anxos Vázquez, nunha visita ao Casco Lanuxe de Vigo | Fonte: Europa Press