A covid-19 segue matando: ascenden a 2.227 os mortos en Galicia tras sete novas mortes
As vítimas que deixa a pandemia da covid-19 en Galicia ascenderon a 2.227 despois de que o Servizo Galego de Saúde (Sergas) notificase na tarde deste sábado sete novas mortes, mesma cifra que o venres.
Por Europa Press / Redacción | Santiago de Compostela | 27/02/2021 | Actualizada ás 20:28
As vítimas que deixa a pandemia da covid-19 en Galicia ascenderon a 2.227 despois de que o Servizo Galego de Saúde (Sergas) notificase na tarde deste sábado sete novas mortes, mesma cifra que o venres.
A provincia de Ourense acumula tres destes falecementos. En concreto, morreron dous homes de 94 e 77 anos no Complexo Hospitalario Universitario de Ourense (CHUO) e unha muller de 95 anos no Hospital do Barco que procedía da residencia de Carballeda de Valdeorras.
A estes hai que sumar outros dous óbitos na provincia da Coruña: un home de 78 anos no Complexo Hospitalario Universitario da Coruña (Chuac) e outro de 83 no Complexo Hospitalario Universitario de Santiago (CHUS).
Ademais, morreu con covid unha muller de 87 anos no Hospital Universitario Lucus Augusti (HULA) de Lugo e un home de 70 no Complexo Hospitalario Universitario de Pontevedra (CHOP).
Segundo concretou Sanidade, estes sete falecementos correspóndense coa xornada do venres --ningún este sábado-- e todos eles contaban con patoloxías previas.
