As mulleres son as máis afectadas polos ERTE en Galicia que se disparan un 50%
Son máis de 15.000 que no último día de xaneiro.
Por Europa Press / Redacción | SANTIAGO DE COMPOSTELA | 02/03/2021 | Actualizada ás 12:01
Galicia pechou o mes de febreiro con 46.665 traballadores en ERTE, o que supón 15.357 máis que o último día de xaneiro, un incremento de case o 50%, segundo os datos que publica este martes o Ministerio de Inclusión, Seguridade Social e Migracións.
Do total de 46.665 persoas nun Expediente de Regulación Temporal de Emprego neste mes marcado polas restricións do coronavirus en Galicia, 19.012 son homes e 27.653 son mulleres. Se se toma como referencia a cifra media, no canto do último día do mes, son 47.207 persoas en ERTE en Galicia en febreiro, neste caso 17.468 persoas máis que a media de xaneiro (29.739), unha alza media do 58,7%.
Por provincias, os traballadores en ERTE o último día do mes eran 21.504 na Coruña, seguida de Pontevedra (15.622), Lugo (5.072) e Ourense (4.467). Do total de persoas en ERTE, 7.268 están nun expediente por forza maior e 3.042, non por forza maior. A eles súmanse as 36.355 persoas nas novas figuras de ERTE por impedimento, limitación, cadea de valor, entre outros.
DATOS ESTATAIS
O número de traballadores en expedientes de regulación temporal de emprego (ERTE) pechou o mes de febreiro en España en 899.383 persoas, o que supón 28.903 traballadores menos que en xaneiro na serie revisada e 160.414 máis en función da data de notificación.
