Xunta e CEG confirman que as dúas estarán na mesa público-privada que deseñe proxectos para os Fondos Europeos

O vicepresidente segundo da Xunta, Francisco Conde, reuniuse este martes co presidente da Confederación de Empresarios de Galicia (CEG), Juan Manuel Vieites, un encontro no que ambos constataron a importancia dos fondos europeos e do diálogo social para facer fronte aos retos do territorio, sobre todo ante as consecuencias da covid-19.

Entre outras cuestións, abordaron as novidades da Lei de simplificación administrativa e reactivación económica de Galicia, que outorgará aos proxectos tractores (incluídos os seleccionados para optar a fondos europeos) unha maior axilidade na súa tramitación e seguridade xurídica.

Neste sentido, Conde incidiu en que se busca xerar estabilidade e confianza cun cambio na cultura administrativa, que incide na simplificación e o apoio ao investimento. Ambos destacaron a oportunidade que supoñen os 'next generation' e Conde sinalou que o Goberno galego formará parte da sociedade público-privada encargada de madurar os proxectos finais que se desenvolverán ao amparo destes fondos.

Entre outras cuestións, analizaron a realidade industrial galega e coincidiron en "axuntar esforzos" para dar viabilidade a proxectos industriais en perigo como o sector electrointensivo, Ence ou Navantia.

APOIO AOS SECTORES

Pola súa banda, Vieites incidiu no papel do diálogo social para conseguir unha planificación e desenvolvemento económico óptimos e que as empresas galegas saian da pandemia o máis airosas posible, así como tamén na aplicación do principio de participación na gobernación dos fondos de recuperación.

"Seguir facendo fronte aos efectos da pandemia con axudas que eviten o peche ou desaparición de numerosas empresas en Galicia afrontando, ao mesmo tempo, a modernización do tecido produtivo galego".

Vieites trasladou a intención de impulsar desde a patronal galega un servizo de apoio ás empresas para a participación e aproveitamento dos Fondos da Unión Europea, que ofreza información e asesoramento ás compañías sobre os instrumentos dispoñibles e as condicións de acceso ao financiamento. Por iso, propuxo a creación dunha oficina conxunta público-privada de identificación de proxectos empresariais da que tamén formen parte as confederacións provinciais.

"E é que debemos traballar estreitamente para promover que as empresas de Galicia accedan aos Fondos de Recuperación e Resiliencia xestionados directamente desde o Goberno de España", expuxo Juan Manuel Vieites.

Así mesmo, a CEG considera imprescindible promover un maior nivel de investimento tanto público como privada en I+D+i como base dun desenvolvemento sólido do tecido empresarial galego e apelou á "internacionalización" como "ferramenta fundamental para a saída da crise do 2008 e para a supervivencia e mantemento da actividade durante a situación que estamos a vivir".

Fotos Xunta /Vicepresidencia Segunda /Reunión Ceg.. Xunta de Galicia / Europa Press