Comezan as obras de rehabilitación do Campus Sur compostelán coa renovación dos bancos existentes

A renovación dos bancos do Campus Sur da Universidade de Santiago de Compostela (USC) comezou este martes pola mañá, nunha actuación que se prevé que teña "continuidade" no tempo a través dun proxecto de rehabilitación integral do campus, pendente de licitación e financiado con fondos Estratexias de Desenvolvemento Urbano Sustentable Integrado (Edusi).

Así o declarou o responsable municipal de Relacións Institucionais, Sindo Guinarte, este martes, nunha visita ás obras na avenida Antonio Raimundo Ibáñez, xunto ao reitor da USC, Antonio López Díaz, e a concelleira de Urbanismo da cidade, Mercedes Rosón.

Guinarte aseverou que se cambiarán, nesta primeira fase, "unha vintena" de bancos, pero que se seguirá tras o verán cun número de bancos que aínda non foi fornecido para a súa instalación. Ademais, procederase á restauración daqueles nos que sexa posible co fin de "apostar pola sustentabilidade" e non xerar "residuos innecesarios".

Tanto o concello como a universidade coinciden na "necesidade" de renovación integral do campus. Así, Guinarte definiu esta intervención como "o punto de partida" para a rexeneración do espazo universitario, que inclúe proxectos como o da Cidade da Saúde, e na que se pretende actuar "sobre todo o espazo posible: viarios, beirarrúas, zonas axardinadas..."

Obras de renovación dos bancos do Campus Sur, en Santiago de Compostela. | Fonte: Europa Press