O Goberno recupera o fondo específico que o PP eliminou para promocionar as linguas cooficiais no audiovisual

O Congreso dos Deputados aprobou este xoves unha emenda transaccional ao proxecto de Orzamentos Xerais do Estado (PGE) pola que o Goberno destinará 10,5 millóns de euros a promocionar a obra audiovisual en catalán, eúscaro e galego.

A emenda, mediante a que se recuperará un fondo específico que viña funcionando entre o 2009 e o 2011, foi acordada entre o Goberno, ERC, EH Bildu e BNG. En paralelo, o Executivo de Pedro Sánchez tamén pactou co partido catalán que as plataformas audiovisuais teñan que ofrecer por Lei un 6% da súa oferta de catálogo en catalán, eúscaro ou galego.

Segundo detallaron este xoves os partidos soberanistas de esquerda, a proposta aprobada pola Cámara Baixa establece "axudas ou créditos a transferir mediante convenios aos organismos competentes das comunidades autónomas con lingua propia distinta ao castelán co fin de fomentar a produción, distribución e promoción da industria cinematográfica e audiovisual en linguas cooficiais".

Neste sentido, ERC, EH Bildu e BNG puxo de relevo que, "entre 2009 e 2011, existía xa un fondo, a través do Ministerio de Cultura, que apoiaba estas producións pero o Partido Popular eliminouno en 2012".

"De feito, na Lei do Cinema de 2007 establécese a creación deste fondo de subvencións co fin de promocionar e protexer o uso do resto de linguas oficiais, ademais do castelán, que deberán ser transferidas aos órganos competentes encargados de xestionar estes recursos", engadiu.

O deputado do BNG no Congreso, Néstor Rego, en rolda de prensa.. BNG