Feijóo iniste na baixada de impostos: "É non ter corazón non baixalos co 10% de inflacción"
"O imposto máis inxusto e o que realmente diminúe a capacidade adquisitiva das rendas medias e altas é a inflación", di.
- Sánchez descarta unha rebaixa xeneralizada de impostos como pide o PP: "Non o fai ninguén en Europa"
Por Europa Press / Redacción | MADRID | 18/04/2022 | Actualizada ás 12:11
O líder do PP, Alberto Núñez Feijóo, confirmou que esta semana enviará ao xefe do Executivo, Pedro Sánchez, a súa proposta económica centrada en baixar impostos tras reunirse o martes cos axentes sociais e o mércores co Comité Executivo do seu partido. Ademais, asegurou que lle "sorprende" que o xefe do Executivo, Pedro Sánchez, se "ría" da proposta do seu partido centrada en rebaixas fiscais para afrontar a inflación próxima ao 10%.
"O imposto máis inxusto e o que realmente diminúe a capacidade adquisitiva das rendas medias e altas é a inflación. E cun 10% de inflación un presidente do Goberno que non baixe os impostos é que non ten corazón e non lle interesan as xentes que teñen dificultades para chegar a fin de mes. Por tanto, sorpréndeme que un presidente do Goberno se ría dunha proposta que están a esperar a maioría dos cidadáns españois", declarou Feijóo.
Así se pronunciou ante os xornalistas tras a súa visita ao centro de saúde no Porriño, xusto despois de que Sánchez criticase nunha entrevista en Antena 3 a rebaixa "xeneralizada" de impostos que expón o líder do PP asegurando que "non é crible" e que "non o está facendo ninguén en Europa".
