Celta, Lugo e Deportivo renovan 30 portarías con redes recollidas do mar
Brais Méndez, Eduard Campabadal e Álex Bergantiños eloxian o proxecto 'Redes Vivas', que xa revalorizou case 2.000 quilos destes residuos da man de mulleres redeiras.
Por Europa Press / Redacción | SANTIAGO DE COMPOSTELA | 27/04/2022 | Actualizada ás 21:29
O Real Club Celta de Vigo, o Club Deportivo Lugo e o Real Club Deportivo da Coruña renovarán un total de 30 portarías con 15 redes doadas por Abanca tras un programa de voluntariado sustentable que consistiu na recollida de utensilios de pesca abandonados en espazos costeiros. O Centro Obra Social de Abanca, situado na Praza de Cervantes de Santiago de Compostela, foi o escenario deste acto de entrega ao que asistiron, en representación dos seus equipos, os futbolistas Brais Méndez (Celta), Eduard Campabadal (Lugo) e Álex Bergantiños (Deportivo).
No acto tamén estiveron a directora de Mercadotecnia da entidade financeira, Susana Ortiz; a responsable de Sustentabilidade, María García; e Ángeles Millet, representante das redeiras artesás de Malpica que realizan, xunto coas súas compañeiras de Corme, os traballos para transformar os residuos no material deportivo. As tres foron as encargadas de realizar a entrega aos xogadores.
Tras a reprodución dun 'anuncio' publicitario da campaña, co lema 'Redes Vivas. Do fondo do mar ao centro do campo', a directora de Mercadotecnia de Abanca explicou como naceu este proxecto a finais de 2019.
E é que na entidade "hai moitas unidades vinculadas á terra e ao mar" que están "moi preocupadas do que ocorre no litoral" con residuos que "o único que fan é contaminar e danar a flora e a fauna". Así, a intención foi "dar unha segunda vida a esas redes fantasmas", para o que a entidade se puxo en contacto coas federacións daquelas disciplinas deportivas que empregan redes.
"E ese triángulo completárono as redeiras", engadiu Ortiz, quen lles agradeceu que "desde o minuto uno dixeron que si" e tiveron que recibir formación para aprender a confeccionar o material deportivo. Deste xeito, as redes recollidas trasladáronse a unhas naves próximas a Malpica e a Corme e alí mesmo empezou un traballo que, a pesar de que se tivo que paralizar en 2020 como consecuencia da pandemia, "retomouse ese verán".
"UN PROXECTO PRECIOSO"
Por parte dos futbolistas intervintes no acto tan só houbo eloxios cara á campaña. Para Brais Méndez, do Celta de Vigo, é un "proxecto precioso" que demostra como o mar é un elemento "primordial" para Galicia. "Hai que pór todos o noso gran de area para facer un planeta máis limpo", engadiu.
Igual que o fixo Méndez, Eduard Campabadal, do Lugo, quixo destacar o traballo das redeiras e enxalzou esta "iniciativa brutal" de Abanca para "darlle unha segunda vida" a todos eses elementos contaminantes. Mentres tanto, Álex Bergantiños, do Deportivo da Coruña, subliñou o exemplo que supón este proxecto para a rapzada, xa que "o deporte está moi vinculado á saúde, á xente nova, e educativamente é importante que se visibilicen este tipo de iniciativas".
CASE 2.000 QUILOS RECUPERADOS
Desde o inicio de 'Redes Vivas', revalorizáronse case 2.000 quilos de redes destinadas a campos de fútbol, fútbol sala, balonmán, e kaiak polo, segundo cifras que achegou a responsable de Mercadotecnia de Abanca, quen prometeu que a intención da entidade é "seguir". "Isto só pode empezar e continuar", asentou.
En concreto, no segundo semestre de 2021 entregáronse 21 xogos de redes --42 portarías-- a 21 equipos e en 2022 está previsto que se entreguen 33 novos xogos --66 portarías--. Neste caso, amplíase o alcance do programa e irán destinadas tanto a clubs de deporte base como a outros equipos profesionais patrocinados polo banco. Cando finalice o ano, renováronse 108 portarías das que se beneficiarán máis de 6.000 deportistas.
