(Vídeo) Tiktokers en galego animan a manifestarse "por un novo futuro para a lingua"

Unha ducia de tiktokers que crean contido en lingua galega publicaron este mércores un vídeo conxunto no que animan ás preto de 100.000 persoas seguidoras na rede social TikTok a participar na manifestación convocada pola plataforma cidadá Queremos Galego o 17 de maio ás 12h, na Alameda de Santiago de Compostela, "por un novo futuro para a lingua".

A burelesa @paulablackmakeuplover abre o vídeo denunciando que "estamos fartas de recibir odio por facer contido en galego", ao que @Letidataberna engade que "queremos TikTok en galego agora e sempre" e @patribdopazo mais a súa avoa rematan cun "queremos un novo futuro para a nosa lingua".

"Por iso nos manifestamos o 17 de maio", explica @rodrimiguez. "Ás 12 da mañá na alameda de Santiago de Compostela", engade @cousasrarisimas. @olaxonmario recorda que "para facilitar a asistencia haberá buses a 5 euros" e @josannl apunta que "os buses sairán desde a Mariña, Ferrol, Lugo, Vigo, Pontevedra e Ourense". Como apunta @irisgestoso, a información está dispoñible en queremosgalego.gal. Pechan o vídeo @pradorua, @todomal.va, @cessarrg e @sarasecorial, que afirman que un novo futuro para a lingua galega é posible e que, por iso, cómpre acudir á manifestación do 17 de maio en Compostela.

A plataforma Queremos Galego, da que forman parte máis de 500 entidades sociais e culturais do país, vén de facer público tamén o manifesto 'En galego agora e sempre. Por un novo futuro para a lingua'. O texto recorda que a situación do galego "non é irreversible e que hai alternativas e vontade colectiva para mudar a tendencia negativa para a lingua", mais tamén salienta que "cómpre que o goberno galego abandone o desprezo polo idioma e garanta presenza e dispoñibilidade en todo e para todo".

"O novo presidente da Xunta ten que abandonar a política de agresión sistemática ao galego e comezar a participar dos esforzos que día a día fai a sociedade", afirma o manifesto. "A lingua galega une é o principal elemento de cohesión, identidade e progreso de Galiza", engade. Por iso, chaman a manifestarse en Santiago para que "a Xunta de Galiza comece a actuar en consecuencia".

 

 

 

 

View this post on Instagram

 

 

 

 

 

 

 

 

 

 

 

A post shared by Sara Dry (@sarasecorial)