BNG cualifica como "inacción política inaceptable" a actuación de Xunta e Goberno sobre a pesca de fondo

O conflito orixinado coa prohibición por parte da Comisión Europea da pesca de fondo en áreas protexidas do Atlántico volveu este martes ao Pleno do Parlamento galego de mans do BNG, que defendeu unha proposición non de lei na que, entre outras cuestións, instaba á Xunta a pór 'motu propio' o recurso contra a decisión, así como ao Goberno do Estado e a Europa a pór medidas compensatorias para a frota afectada.

Durante a súa defensa, a deputada nacionalista Rosana Pérez cargou tanto contra a Xunta como contra o Goberno central no que considera "unha situación de inacción política inaceptable" cando se cumpre case un mes desde que se coñeceu a prohibición e máis dunha semana desde a súa entrada en vigor.

En todo este período, dixo, "o ministerio segue sen dixerir a presentación do recurso" que comprometeu contra esta decisión, mentres que a Xunta "xa renunciou a presentalo, tras prometer ao sector que esgotaría todas as vías legais".

Do mesmo xeito, apuntou, "non vai haber Consello Galego de Pesca" para analizar a cuestión, "nin hai petición de moratoria", dixo Rosana Pérez, que criticou que as medidas "se limiten a manifestar coa boca pequena o seu desacordo".

"Despois da decisión da prohibición, temos que aceptar outra situación aínda peor, a dos políticos que teñen a obrigación de velar pola frota e que o único que fan é fuxir da súa responsabilidade", dixo.

Para Rosana Pérez, "é hora de que a Xunta convoque o Consello Galego de Pesca" e que "presente un recurso xudicial" contra a decisión "independentemente do que faga o Estado español". "É necesario que a Xunta lidere esta loita contra unha decisión absolutamente arbitraria", engadiu.

Por outra banda, a deputada nacionalista pediu fondos europeos e nacionais "para apoiar economicamente ao sector" afectado pola medida, así como que a Xunta elabore un plan che continxencia para minimizar os efectos.

UN RECURSO "MOI COMPLEXO"

Pola súa banda, a deputada socialista Patricia Otero criticou que o BNG suxira "que o Goberno central está a manipular ao sector" e garantiu que o ministro Luís Planas "estivo desde o primeiro momento á beira do sector". "Non nos cansaremos de dicir que o PSdeG estivo en contra desta decisión desde o primeiro momento", destacou.

Ante esta "decisión inxusta", lembrou Otero, o Goberno central xa avanzou que presentará un recurso, aínda que xustificou a súa tardanza argumentando que a súa "fundamentación técnica é moi complexa". "É necesario que se faga este recurso da mellor maneira posible para que este barco chegue a bo porto", dixo a deputada socialista.

Paralelamente, defendeu as xestións que se realizaron desde o Goberno central e asegurou que, "froito das negociacións" e da "insistencia do ministro Planas, logrouse aclarar que o veto é "por baixo de 400 metros".

O PP PIDE A RUPTURA COS VERDES

Finalmente, tomou a palabra a deputada do PPdeG Teresa Egerique, que acusou ao BNG de "xogar ao descoido", á vez que lle reclamou "coherencia". "Coherencia sería romper definitivamente cos verdes en Europa, que co seu medioambientalismo radical 'non nos entenden non'", dixo Egerique, parafraseando o himno galego.

Neste sentido, afeou ao BNG que a súa eurodeputada, Ana Miranda, estea incluída neste grupo e que só ela votase en contra da medida, sen ser capaz de "convencer" a ningún dos Verdes, que "son os que se están cargando a frota galega". Egerique tamén criticou a actitude da Comisión Europea, que "tiña a decisión tomada de antemán" e "actuou de mala fe" e instou ao Goberno de España a presentar o recurso contra a norma.

En canto á posición dos populares, Egerique dixo que o compromiso da Xunta "está máis que demostrado" e que a orientación do seu grupo está "máis que clara". Por iso, criticou que se traia esta iniciativa cando xa existen "tres acordos por unanimidade", unha comparecencia parlamentaria da conselleira do Mar e unha carta asinada polo tres portavoces parlamentarios e remitida ao Comisario Europeo de Pesca, ao embaixador da representación permanente de España ante a UE e ao presidente da Comisión de Pesca do PE.

"Que o BNG volva hoxe ao pleno cunha nova proposta de acordo evidencia que queren emendar algún erro que cometeron en Bruxelas ou insistir en que non teñen nada que ver co grupo ao que pertence o comisario que tomou a decisión do veto", dixo.

Arquivo - A deputada Rosana Pérez no estrado do hemiciclo do Parlamento galego. BLOQUE NACIONALISTA GALEGO - Arquivo