Arde un autobús urbano en Santiago, o segundo en dous meses

Efectivos dos bombeiros de Santiago mobilizáronse para a extinción dun lume que afectou un autobús urbano en Santiago de Compostela. O vehículo ardeu, aínda que non viaxaban pasaxeiros no seu interior e o condutor resultou ileso.

Así o ratificaron fontes dos bombeiros da capital galega, que indicaron que foi necesario cortar o tráfico ao redor dunha hora na estrada que leva ata o aeroporto de Lavacolla, mentres non remataban as tarefas da intervención.

En concreto, a chamada de alerta produciuse sobre as 11,20 horas e deuse o aviso de onde se atopaba o autobús, na parroquia compostelá de San Marcos, na N-634.

Ata o lugar desprazáronse dúas dotacións de bombeiros e outros medios materiais. Xa no sitio, puideron comprobar que o condutor estaba fóra e que o vehículo empezara a arder pola zona do motor.

Este non é o primeiro incendio que se rexistra nun bus urbano na capital galega. Houbo outro o pasado 30 de agosto, en Aríns. Naquel lume, un dos bombeiros que se desprazou ata a zona e que estaba de prácticas faleceu durante a intervención.

As queixas veciñais en relación ao servizo do bus urbano na capital galega e sobre o estado da frota de vehículos aumentaron, ademais, nos últimos meses.