Formoso advirte que "de nada vale ter un presidente galego" na Moncloa "se despois non mira por Galicia"

O secretario xeral do PSdeG, Valentín González Formoso, advertiu este venres que "de nada vale" que na Moncloa haxa un presidente galego "se despois non se comporta como galego e non mira polo país". O líder dos socialistas galegos participou este venres no 40 aniversario do Consello da Cultura, onde fixo un chamamento fronte á censura que "volve da man do PP e Vox". O responsable socialista sinalou que "Galicia quere presidentes do goberno comprometidos" co país, e fixo un citado as medidas de apoio a Galicia aprobadas polo goberno presidido por Pedro Sánchez.

Así, lembrou que o AVE chegou a Galicia cun goberno presidido polo PSOE que "apostou polo emprego e a industria galegas", sinalou o compromiso coa continuidade de Alcoa na Mariña, a continuidade de Stellantis coa incorporación da Moi Alta Tensión, que garante a subministración enerxética a baixo custo, ou os 4.000 millóns de investimento no estaleiro de Navantia que van garantir carga de traballo para os próximos 15 anos.

Así mesmo, explicou que o Salario Mínimo tamén supón a mellora das condicións dos traballadores e traballadoras galegos, así como a revalorización das pensións conforme ao IPC para as 770.000 pensións de Galicia. "Canta máis forza teña o PSOE máis dereitos sociais vai garantir, porque darlle forza ao PSOE significa forza para os traballadores, as clases medias galegas e darlle forza a Galicia", indicou.

Formoso contrastou a acción do goberno de Sánchez coa experiencia dun Mariano Rajoy que "non velou polos galegos e galegas cando, co aplauso de Feijóo, decidiu revalorizar as pensións por baixo dos prezos, que nada ten que ver cunhas pensións dignas", como hai agora. Tamén tivo o apoio de Feijóo, lembrou, para apoiar unha reforma laboral contra os intereses dos traballadores.

CENSURA

Formoso alertou de que o próximo 23X tamén está en xogo ver como "volve a censura da man do PP e de Vox", aludindo á prohibición das obras culturais e de teatro "ao longo e ancho do país" por mor dos acordos de goberno entre as dúas formacións políticas. Tamén alertou que están a reproducir "algo que nunca se viu en etapa democrática en España" e que "preocupa enormemente ás familias galegas".

Ademais, animou a concretar o voto no PSOE para frear a chegada da dereita e da extrema dereita á Moncloa, que quere "volver atrás 40 anos e ao branco e negro que supuxo a ditadura durante moitos anos". Por último, apuntou que os socialista galegos despregarán unha campaña de "moitísima pedagoxía" para lembrar as consecuencias do "tándem" da dereita e a extrema dereita.

O secretario xeral do PSdeG, Valentín González Formoso, en declaracións aos medios. PSDEG | Fonte: Europa Press