Verea (PP) pide máis man dura contra os actos incívicos dos turistas en Santiago

O portavoz do Partido Popular de Santiago, Borja Verea, asegurou este luns que as campañas informativas que está a promover o goberno liderado por Goretti Sanmartín "non son suficientes e non van evitar os actos vandálicos e as actitudes inapropiadas" dalgúns turistas nas últimas semanas.

Fronte a isto, apostou por "pór multas significativas" e afirmou que desde o PP "considérase máis efectivo facilitar a normativa, co fin de que sexa máis fácil pór ditas sancións", así como "que se poida contar con máis presenza policial, para garantir que esas actitudes incívicas desaparezan".

O popular apuntou que no pasado pleno ordinario desde as súas filas propúxose "a realización dun regulamento", algo que o goberno dixo "que non facía falta". "Alegrámonos que agora cambien de idea e se acheguen ás nosas iniciativas", dixo Verea, en relación ao anuncio realizado pola concelleira de Turismo sobre que estudarán ampliar a ordenanza municipal.

"Sabemos que son poucas, pero maleducadas, as persoas que levan a cabos estes actos, polo que reiteramos que o máis efectivo son as multas e a maior presenza policial, posto que este tipo de situacións vanse multiplicando a medida que pasan as semanas", sentenciou.

O candidato do PP á alcaldía de Santiago, Borja Verea, en rolda de prensa.