O PSdeG considera a externalización do aborto en Galicia "un novo atentado contra os dereitos das mulleres"

A deputada socialista Leticia Gallego volveu a cargar este luns coa decisión da Xunta de externalizar as interrupcións voluntarias do embarazo inferiores a 14 semanas en centros privados, reclamando que se garanta o dereito ás mulleres a ser atendidas no centro público máis próximo e preguntándose se esta decisión "non terá que ver cos pactos do PP con Vox".

Nunha rolda de prensa en Santiago, Gallego considerou esta decisión "un novo atentado contra os dereitos das mulleres" e lembrou que, segundo a Lei de Saúde Sexual e Reprodutiva, "os hospitais galegos teñen que garantir persoal non obxector para un dereito fundamental para as mulleres". Os socialistas consideran que este é "un paso máis" no intento da Xunta de "privatizar a sanidade galega" e cualifican o concurso, "presentado no mes de agosto", de "escándalo".

Paralelamente, Leticia Gallego indicou que a xustificación desta externalización, que terá un custo de 500.000 euros a tres anos, "contradí o que dixo o propio conselleiro" a unha interpelación socialista este mesmo ano, na que apuntou que "a obxección non é un problema" para este tipo de intervencións. "Na mesma intervención, o conselleiro dicía que xa se contaba con medios no sete áreas sanitarias, sempre dentro do sistema público", dixo a deputada.

RECOMENDACIÓN DO CONSELLO DE CONTAS

Preguntada por esta cuestión, a viceportavoz do Grupo Popular, Paula Prado, asegurou que esa externalización obedece a "unha recomendación do Consello de Contas", para que "calquera contrato fose do Sergas ten que ser licitado".

"Cunha soa interrupción que se fixese fose do Sergas, terían que sacar esa licitación", apuntou Prado, asegurando que "o 100 por cen están a facerse os centros públicos, salvo as que se solicitan nun centro privado" por decisión da muller.

A deputada do PSdeG Leticia Galego.. PSDEG | Fonte: Europa Press