Pasar de fixo continuo a descontinuo non é motivo de despido, segundo o TSXG

O Tribunal Superior de Xustiza de Galicia determinou que a negativa dun traballador a aceptar a conversión do seu contrato como fixo continuo a fixo descontinuo non é un motivo válido para o seu despedimento.

Así o sentencia os maxistrados do alto tribunal galego nunha resolución na que desestiman o recurso de suplicación presentado por un exempleado dunha empresa pontevedresa, xa que entenden que o seu despedimento pode xustificarse ao estar detrás da oferta empresarial para cambiar os termos do contrato razóns de índole organizativa ou económicas.

Trátase da primeira vez na que a sala do Social do TSXG se pronuncia sobre a conversión dun contrato fixo continuo en fixo descontinuo, motivo que, segundo o demandante, estivo detrás do seu despedimento, xustificado pola empresa por razóns de perda de carga de traballo.

Deste xeito, e a pesar de que, neste caso, o tribunal entende que o despedimento non se produciu pola negativa do traballador a aceptar que o seu contrato pasase a ser de fixo descontinuo, os maxistrados establecen que este non pode ser un motivo válido para prescindir de forma legal dun empregado.

Nunha resolución facilitada polo TSXG, os xuíces marcan que a contratación como fixo descontinuo é unha fórmula "atípica" e que, por tanto, deben establecerse "certas garantías asociadas ao principio de voluntariedade, dirixidas a evitar que esa contratación sexa imposta pola empresa".

Sinalan que "nin antes, nin despois" da reforma laboral de 2021 existen estas garantías no artigo 16 do Estatuto dos Traballadores, onde se regula a contratación fixa descontinua. Con todo, os xuíces entenden que o Dereito da Unión Europea considera este tipo de contratos como de tempo parcial, polo que é dentro deste prisma legal onde se debe encadrar a voluntariedad do empregado a aceptar cambios no seu status laboral.