Jácome di que teme máis atrasos nas obras da intermodal que fagan finalizar os traballos despois do 2023
"É unha proba máis da permanente discriminación da cidade de Ourense, que é a Cinsenta de Galicia", declarou o alcalde ourensán.
Por E.P. | SANTIAGO DE COMPOSTELA | 26/09/2023 | Actualizada ás 18:21
O alcalde de Ourense, Gonzalo Pérez Jácome, teme novos atrasos por parte do Goberno central na execución das obras de construción da estación intermodal da cidade, que provoquen que a obra vaia máis aló do 2030.
"Podo anunciar que, nunha altísima probabilidade, o Goberno central non vai adxudicar as obras da nova estación de tren", manifestou o rexedor tras ser coñecedor de que o Estado ten previsto realizar unha revisión de prezos do proxecto e realizar unha nova licitación.
"As obras xa foron licitadas cun orzamento de 130 millóns de euros, presentáronse empresas, pero non se vai adxudicar a ningunha", dixo o alcalde asegurando que "revisarán os prezos e volverán licitalas", o que provocará, nas súas palabras, un atraso de obras que "é bíblico".
A xuízo do rexedor, o Executivo central "atopou unha escusa" para atrasar de novo unha obra "que non quere realizar" e nestes termos criticou que o novo trámite de adxudicación atrasaría a actuación, que "non comezaría ata 2025 e non estaría terminada antes do 2030, no mellor dos casos".
Así pois, remarcou "a gravidade" desta situación e o agravio comparativo entre Ourense e outras cidades galegas, á vez que lembrou que a estación de Vigo xa foi inaugurada hai meses, mentres que a da cidade das Burgas segue sen construírse e "agora vaise a licitar unha vez máis". "É unha proba máis da permanente discriminación da cidade de Ourense, que é a Cinsenta de Galicia", resolveu o mandatario local.
