Educación adianta nun ano a súa proposta para baixar o número de alumnos por aula e ábrese a falar do horario lectivo

A Consellería de Cultura, Educación, FP e Universidades introduciu algún avance na súa proposta de acordo cos sindicatos para reducir os cocientes de alumno por aula en Infantil e Primaria, pero por agora non incluíu a redución do horario lectivo para volver ao que había antes de 2011.

Esta ultima é unha cuestión que as organizacións representantes dos traballadores sitúan como unha "liña vermella" (algunhas delas mesmo advirten de mobilizacións e protestas se non se contempla). Neste contexto, a Consellería ábrese a falar diso a partir da nova reunión, que será o venres, segundo confirman fontes deste departamento. A Administración mantivo unha segunda reunión na mañá deste mércores (máis breve que a primeira, que foi o luns) cos sindicatos da mesa sectorial (CIG, CCOO, ANPE e UGT) na Escola Galega da Administración Pública (EGAP), sen que polo momento haxa acordo.

O borrador inicial que a Consellería lles remitía o pasado venres si introduce agora algún cambio. Con todo, a CIG-Ensino, sindicato maioritario, continúa sen entrar na negociación por non contemplarse a volta ao horario lectivo anterior ao ano 2011, cando pasou de 18 a 21 as horas de clase á semana en ESO e Bacharelato, e de 21 a 25 en Infantil e Primaria.

O groso do borrador pasa pola redución progresiva do número de alumnos por aula. O novo calendario presentado pola Consellería supón unha aceleración dos tempos: para o curso 2024/25, en 4º de Infantil reduciríanse de 25 a 20 os nenos por cada clase e así se faría de forma paulatina, ano a ano, ata culminar con 6º de Primaria no curso 2032/33. A proposta inicial acababa un ano máis tarde.

A redución non afecta nin a ESO, nin a Bacharelato, nin a ciclos de FP, pero fontes da Consellería avanzan que se estudará esta petición de face ao venres. A Administración introduce tamén novos parágrafos no acordo. Por unha banda, os nenos que conten con algunha incapacidade recoñecida contarán como dous para establecer o cálculo.

Outra das novidades é o compromiso de que, durante o período de aplicación do calendario de cocientes, os cursos que aínda non se vexan afectados por esta medida non verán como se suprimen unidades. Isto implica que, se agora nun centro hai 27 alumnos en 6º de Primaria repartidos en dúas clases de 14 e 13, respectivamente, a Xunta manterá o desdobre aínda que o próximo curso haxa 24 nenos (marcháronse tres), unha cifra que os actuais cocientes permiten que haxa nunha soa aula.

O borrador contempla un incremento de 55 euros mensuais (antes eran 45) no complemento por desempeñar labores directivos e de xefatura de estudos; e unha subida do 10 por cento para o plus por funcións de titor, a cobrar a partir de 2025. Tamén se propón agora un grupo de traballo este mesmo curso para elaborar un plan de redución de cargas burocráticas. Este novo borrador demostra que a Administración ten "o firme compromiso de chegar a un acordo canto antes" que debuxe o modelo educativo galego "da próxima década", tal e como destaca o director xeral de Centros e Recursos Humanos, Jesús Álvarez, ao termo do encontro.

CIG: "A NEGOCIACIÓN EMPEZA O VENRES"

A CIG-Ensino, sindicato maioritario, segue sen entrar na negociación por non introducirse aínda o horario lectivo. O seu secretario nacional, Suso Bermello, cre que "ata agora" o diálogo na mesa sectorial "foi unha representación teatral". Insiste en que a súa organización "non está disposta" a acudir a estas reunións "a facer comentarios de texto", polo que espera que para o próximo encontro xa se empece a falar do horario. "Para a CIG, a negociación empeza o venres", agrega Bermello.

A central nacionalista non entregou as súas propostas aos representantes da Consellería, pero si as fixo públicas. Ademais do horario lectivo e dunhas subidas retributivas máis altas, que debería volver ao que había antes de 2011, reclama uns cocientes máis baixos que as propostas pola Xunta nun horizonte máis inmediato.

Así, a CIG pide reducilas a 15 alumnos por aula de Infantil para o curso 2027/28; a 20 en Primaria para o ano 2026/27; e a 25 en ESO e Bacharelato para o 2025/26. En FP, para o curso 2024/25 teríanse que reducir a 25 ou 20, en función do tipo de ciclo, a 15 na FP básica e a 30 na modalidade a distancia.

"SEGUIR NEGOCIANDO, POR RESPONSABILIDADE"

Pola súa banda, José Manuel Fuentes (CCOO) lamenta que o documento siga sendo "insuficiente" pero, a pesar das liñas vermellas que mantén o seu sindicato, aposta por "seguir negociando, por responsabilidade". CCOO aínda non avala o calendario de redución de cocientes, pero si valora que agora haxa o compromiso de non suprimir unidades durante o proceso. Así mesmo, Fuentes propón que, durante o tempo de aplicación do devandito calendario, non se poidan aumentar as cifras de alumnos por aula, é dicir, se actualmente en 1º de Primaria hai un curso con 22 alumnos, que esta clase continúe con ese número ata 6º.

Por parte do sindicato ANPE, o seu presidente en Galicia, Julio Díaz, defendeu na reunión que o novo documento aínda está "moi lonxe de ser susceptible de asinar". Entre outros motivos, porque segue sen estar o horario lectivo. ANPE sinala como "importante" a adquisición dun compromiso por parte da Xunta de que non vai haber supresións nin redución de profesorado ao baixar o número de alumnos e, por conseguinte, os cocientes, pero reclama maiores incrementos retributivos, ata do 90 por cento en dous anos para as funcións directivas.

A portavoz de UGT na negociación, Sandra Montero, valora os "avances" aínda "insuficientes" alcanzados este mércores, porque a Consellería aínda non toca nin os cocientes de Secundaria nin o horario lectivo. UGT tamén demanda aumentos retributivos máis altos, á vez que lamenta que "aínda non" se fale de medidas concretas nese plan de reducir a burocracia que se implantaría no curso 2024/25.

O director xeral de Centros e Recursos Humanos, Jesús Álvarez, participa na Mesa Sectorial Docente non Universitaria | Fonte: XUNTA