Os migrantes fan que Galicia free a despoboación: gaña 6.599 habitantes en 2022
Rompe coa tendencia á baixa e roza volver superar os 2,7 millóns de persoas: 2.699.424.
Por Europa Press / Redacción | SANTIAGO | 13/12/2023 | Actualizada ás 12:22
Galicia conta con 2.699.424 habitantes a 1 de xaneiro de 2023, 6.599 persoas máis que o ano anterior (+ 0,25 %), segundo datos do censo de poboación publicados polo Instituto Nacional de Estatística (INE) este mércores. Desta forma, a comunidade galega rompe coa tendencia á baixa dos últimos anos e queda ás portas de volver superar os 2,7 millóns de persoas.
Este crecemento poboacional débese ao aumento da poboación con nacionalidade estranxeira, que sobe en 20.132 persoas durante 2022 (pasa de 119.174 a un total 139.306). Este incremento serve para paliar a caída de máis 13.500 persoas de nacionalidade española. A poboación residente en España a 1 de xaneiro de 2023 situouse en 48.085.361 habitantes, 598.634 persoas máis que na mesma data de 2022 (47.486.727), o que supuxo un incremento do 1,26 %, un punto por encima do 0,25 % de alza en Galicia.
A CORUÑA LIDERA O CRECEMENTO
Hai un aumento de poboación nas catro provincias, aínda que se observan diferentes crecementos. A Coruña gaña 4.720 (+ 0,4 %) persoas censadas, cun total de 1.123.884. Pontevedra conta con 1.512 máis (+ 0,16 %), polo que alcanza os 946.710 habitantes. En Ourense prodúcese un aumento de 340 censados (+ 0,11 %), un total de 304.563. Mentres, Lugo só crece en 27 persoas (+ 0,008 %), para un global de 304.563. Por sexos, había 1.400.360 mulleres en Galicia censadas a 1 de xaneiro de 2023, mentres que os homes eran 1.299.064.
