Por Europa Press / Redacción | SANTIAGO DE COMPOSTELA | 14/12/2023 | Actualizada ás 14:56
A Xunta situou no Estado a "solución" para os "problemas" dos avogados da quenda de oficio que reclaman melloras retributivas e de organización do seu traballo para favorecer a súa conciliación, algo que, segundo a Administración galega, debe afrontarse cunha reforma da Lei de asistencia xurídica gratuíta nas Cortes xerais.
Así o indicou o director xeral de Xustiza, José Tronchoni, en resposta a unha pregunta feita polo deputado nacionalista Iago Tabarés na Comisión 1ª do Parlamento galego, celebrada este venres. Alí, o responsable do Goberno galego manifestou que fixar un prezo polos servizos xurídicos "ten dous obstáculos" e que "un deles é insalvable" pois implicaría recorrer á Lei de contratos do servizo público que, di, "posiblemente" obrigaría a licitar estes servizos, algo que "non está na axenda" da Xunta.
O outro "obstáculo" sinalado por Tronchoni é a "gran competitividade profesional" que existe no sector da avogacía pola "existencia de grandes despachos e de tarifas 'low cost' que están por baixo das cantidades fixadas nos baremos". Tamén se referiu a a reclamación dos avogados da quenda de oficio que se atopan en folga, que piden a creación dun corpo de letrados de xustiza gratuíta dependente da Xunta. Para Tronchoni, este órgano suporía "acabar coa garantía dunha boa defensa de xustiza gratuíta" e da "tutela xudicial efectiva pola existencia dos principios de xerarquía".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.