Pontón acepta o reto de liderar unha Xunta na que estean outras forzas políticas

A candidata do BNG á Presidencia da Xunta, Ana Pontón, valorou que o debate da CRTVG deixou "claro" que o próximo 18 de febreiro ou hai "un presidente do BNG ou do PP". "Estamos nun momento no que quen ten a palabra é a cidadanía e os pactos tenos que decidir a cidadanía co seu voto o próximo 18 de febreiro, se esa é a decisión que toma a cidadanía, eu vou estar moi orgullosa de representar un cambio de ciclo neste país e de pór un goberno en marcha que represente toda a pluralidade que exista en Galicia", dixo en  alusión á posibilidade de que as contas dean para que o BNG, PSdeG e Sumar poidan formar un goberno logo do 18F.

Neste sentido, asegurou que o fará "con outra maneira de gobernar: desde o diálogo, man tendida e capacidade de escoita e capacidade de chegar a acordos despois de 15 anos do PP que usou a maioría absoluta de forma absolutista", agregou.

A preguntas dos medios antes de realizar unha viaxe en tren nun acto para explicar o programa en mobilidade ferroviaria --tanto de pasaxeiros como de mercadorías--, Pontón incidiu en que é o momento de abrir "un tempo novo" cun "proxecto sólido" e por iso pídelle a "confianza aos galegos para que ese proxecto teña o máximo apoio nas urnas".

Neste sentido, afirmou que "a única papeleta que garante un cambio e un tempo novo facendo historia é a papeleta do BNG", polo que animou á cidadanía a unha "gran participación e a que vaia a votar". Para a líder nacionalista, quedou "claro" que o próximo 18 de febreiro "ou hai unha presidenta do BNG" ou goberna o PP, "son os dous modelos" e a "cidadanía ten dereito a que se saiban".

PONTÓN PROMETE UN ENTE FERROVIARIO GALEGO

Pontón comprometeuse este martes un ente ferroviario galego, o Galtren, para impulsar esta infraestrutura, as conexións e as frecuencias, potenciar e mellorar o transporte de mercadorías e vertebrar o interior de Galicia, situando como unha das prioridades a conexión entre Lugo e Santiago de Compostela. Pontón, a candidata por Ourense, Noa Presas, e o seu equipo subiron ao tren das 10,20 horas para realizar a viaxe ata a cidade das Burgas. Nesta experiencia en primeira persoa tiñan intención de atoparse con eles a cabeza de lista por Lugo, Olalla Rodil, e o seu número dous, o mariñense Dani Castro, pero quedaron 'tirados' en Monforte de Lemos, tras unha avaría na liña en Oural, en Sarria (precisamente á beira da casa natal da candidata do BNG) e esperar máis dunha hora, como eles mesmos narraron nas redes sociais.

"Realmente para nós foi efectivamente unha odisea, pero o peor é toda a xente que viña co tren, que chegaba tarde ao traballo e non era a primeira vez que ocorría. Vivimos de primeira man a falta de servizos do transporte do século XXI, do que Lugo non pode quedar illado", manifestou Olalla Rodil, despois de saír, xunto a Dani Castro, ás 9 horas de Lugo e aínda estar en Ourense a sobre as 11 horas coa perspectiva de poder chegar á capital termal pasado o mediodía.