Por Europa Press / Redacción | PONTEVEDRA | 15/02/2024 | Actualizada ás 21:55
A vicepresidenta segunda do Goberno, Yolanda Díaz, e a candidata de Sumar á Presidencia da Xunta, Marta Lois, subliñaron que a posibilidade dun cambio na Xunta depende de que Sumar logre os dous escanos que, din, compiten co PP nas provincias da Coruña e Pontevedra.
É a mensaxe no que incide Sumar Galicia no tramo final da campaña: que "o cambio" non será posible se quedan fóra do Parlamento galego porque, aseguran, eses escanos de "os restos" nas provincias atlánticas irán parar ao Partido Popular.
Sobre esta proclama virou o mitin que reuniu a unhas 150 persoas nunha sala (na que quedaron cadeiras baleiras) da sede de Afundación de Pontevedra. Alí pechou a xornada a vicepresidenta e líder de Sumar, envorcada co final da campaña galega para arroupar á súa candidata, Marta Lois.
Despois de contar co portavoz no Congreso, Íñigo Errejón, pola mañá nun acto con estudantes da Facultade de Ciencias Políticas da USC, na tarde foi a quenda do ministro de Cultura, Ernest Urtasun.
Yolanda Díaz apelou directamente ao 20% de indecisos que apunta o último barómetro do CIS. A eses "que dubidan", a vicepresidenta galega anima a optar por Sumar porque "a fórmula matemática é clave" e os escanos aos que opta polas circunscricións da Coruña e Pontevedra xóganllos ao PP.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.