Morre un operario tras caer dunha altura mentres traballaba nunha empresa de Carballo

Un traballador faleceu na tarde deste luns ao sufrir unha caída cando traballaba nunha empresa situada na rúa Titanio, no polígono de Bértoa, en Carballo. Segundo informou o CIAE 112 Galicia, os servizos de Urxencias Sanitarias de Galicia avisaron do suceso sobre as 18.15 horas á Central do 112.

Nesta comunicación indicaban que un traballador caera dunha certa altura neste punto e que se mobilizou a aeronave medicalizada con base en Santiago de Compostela ata o lugar. A maiores, desde o 112 Galicia tamén se informou do sucedido aos axentes da Policía Local e da Garda Civil e aos efectivos de Protección Civil de Carballo. Finalmente, o persoal sanitario confirmou que a pesar dos esforzos, non se puido facer nada por salvar a vida do traballador.

Helicóptero medicalizado do 061 con base en Santiago | Fonte: Europa Press - Arquivo