Arquivada unha denuncia do PSdeG contra Jácome pola inauguración dunha rampla mecánica en precampaña

A Xunta Electoral de Galicia acordou o arquivo dunha denuncia presentada polo PSdeG contra o alcalde de Ourense e líder de Democracia Ourensana, Gonzalo Pérez Jácome, pola inauguración dunha rampla mecánica na precampaña. Os socialistas formularon o 20 de febreiro unha denuncia na Xunta Electoral de zona de Ourense contra Jácome ao considerar que infrinxía o artigo 50 da Lei orgánica de réxime electoral xeral (Loreg) pola inauguración o día 2 de febreiro, durante a precampaña, da rampla mecánica da Carballeira coa súa posta en funcionamento.

Este artigo prohibe expresamente durante o período electoral calquera acto organizado ou financiado, directa ou indirectamente, por poderes públicos que conteña alusións ás realizacións ou logros obtidos. Os socialistas argumentaban que o evento fora organizado polo Concello e financiado con fondos públicos e que "buscaba encamiñar claramente o voto para o partido que sostiña o goberno local". Con todo, nas súas alegacións, Jácome asegurou que na inauguración "non houbo representación institucional nin convocatoria de autoridades nin de medios de comunicación. Ademais, apuntou que tampouco se celebrou acto institucional algún.

Por iso, indicou que estaba claro que non se trataba dun suposto de incidencia dos poderes públicos na campaña electoral mediante unha campaña institucional, senón ante a "posta en funcionamento dun servizo", unha acción amparada pola norma, que contempla que o período electoral non interrompe as actuacións dos poderes públicos que resulten necesarias para a salvagarda do interese público.

Así as cousas, a Xunta Electoral de Galicia considerou que a denuncia non concretou os elementos que puidesen relacionarse cun acto de natureza institucional do Concello que puidese incorrer na prohibición establecida na norma e considera que as actuacións denunciadas sitúanse no ámbito do funcionamento ordinario da administración pública, polo que, nunha resolución con data do 26 de febreiro, acorda o arquivo.

ARQUIVADA OUTRA DENUNCIA DO PP CONTRA O PSOE

Por outra banda, noutra resolución con data do 26 de febreiro, a Xunta Electoral de Galicia acorda o arquivo doutra denuncia, neste caso do Partido Popular contra o PSdeG pola existencia de propaganda socialista nas inmediacións do colexio electoral Labaca, da Coruña. En concreto, segundo sinala o acordo, tratouse duns carteis con formato electrónico que non é posible retirar con facilidade e que, segundo a xunta electoral, "non estaban na proximidade inmediata dun colexio electoral". Polo que considera que o PSdeG non incorreu no suposto de infracción electoral e procede ao arquivo da denuncia.

O candidato de Democracia Ourensana, Gonzalo Pérez Jácome, durante a súa intervención na sesión de constitución do Concello de Ourense | Fonte: Rosa Veiga - Arquivo