Pontón insta á Xunta a non "boicotear" a declaración de zona tensionada e ofrece un "gran acordo de país"
Besteiro insta o Goberno galego a "porse as pilas" coa política de vivenda e colaborar cos concellos para habilitar chan.
Por E.P. | SANTIAGO DE COMPOSTELA | 22/04/2024 | Actualizada ás 16:21
A portavoz nacional do BNG, Ana Pontón, volveu a ofrecer ao Goberno do PP un "gran acordo de país en materia de vivenda" ao considerar que se trata dun dos grandes problemas que sofren "miles e miles de galegos e galegas, especialmente a xente nova", e pediu á Xunta que deixe de "boicotear" a declaración de zonas tensionadas.
Nunha rolda de prensa ofrecida este luns, Pontón sostivo que para moitos galegos é "misión imposible" acceder a unha vivenda porque os prezos non son acordes aos salarios. Por iso, sinalou que facilitar o acceso é unha das prioridades do "goberno alternativo" do BNG.
Pontón abordou o problema da vivenda con responsables municipais do BNG neste ámbito e propuxo ao Executivo de Rueda chegar a un "gran acordo de país" ante unha "subida descontrolada" dos prezos do aluguer que, segundo advertiu, "o Goberno do PP propiciou e amparou ao dinamitar a política social" en vivenda e que se sitúa nun incremento medio en Galicia do "44%" no últimos dez anos, ata un 63% en cidades como A Coruña.
"Non coñezo a ninguén que neste tempo tivese un incremento do seu salario nin do 44% nin do 66%", reflexionou para, a continuación, criticar ao Executivo de Rueda pola súa "inacción" fronte ao problema. Ademais, reprochoulle que "nin sequera sexa capaz de xestionar os recursos e as axudas que en teoría ten", en alusión á denegación da Xunta de axudas ao aluguer que foron solicitadas en 2022.
O obxectivo do BNG é dar prioridade no curto prazo á compra de vivenda baleira, rehabilitándoa se é necesario e tendo en conta que "hai medio millón de inmobles baleiros" en Galicia, de vos que 90.000 "están concentrados nas cidades".
INICIATIVAS DOS SOCIALISTAS
En materia de vivenda tamén se pronunciou este luns o portavoz parlamentario do BNG, José Ramón Gómez Besteiro, quen reclamou un maior impulso e máis execución dos programas de vivenda pública por parte do Goberno galego. Ademais, reiterou a súa proposta de acordo de país pola vivenda para situala como un dos eixos das políticas públicas da lexislatura.
O secretario xeral electo do PSdeG pediu á Xunta que abra "un diálogo sensato e serio" cos concellos galegos para habilitar chan urbanizable e que achegue fondos propios para complementar as axudas ao aluguer do Estado.
Así mesmo, emprazou ao presidente do Executivo galego a "tomar nota e porse as pilas" neste asunto despois de coñecer a semana pasada a "xestión pésima" do Bono alugueiro mozo, "avisando por SMS a miles de mozos que quedan fóra despois de dous anos de espera".
Sobre este asunto, Besteiro sinalou que os socialistas teñen xa rexistrada unha batería de iniciativas para reclamarlle ao Goberno galego que achegue fondos propios para atender aos mozos que quedaron sen axuda. Ademais, advertiu que os datos de execución orzamentaria do ano pasado "non permiten ser optimistas" para a xestión futura da vivenda ante a "mala execución" por parte do Goberno galego, que "deixou sen executar a metade do orzamento dispoñible no programa Promoción de Vivenda".
