O PP apela a "recuperar o tempo perdido" na xestión do litoral tras o fallo do TC que avala a lei galega

O PP galego escenificou este sábado desde tres localidades costeiras das provincias galegas con mar a súa satisfacción polo fallo do Tribunal Constitucional que avala a lei galega do litoral, unha decisión que, para os populares, abre un escenario no que toca "recuperar o tempo perdido" para poder xestionar a costa "sen trabas".

Os populares déronse cita de forma simultánea en tres localidades das tres provincias galegas con costa para dar lectura a un manifesto no que reivindican Galicia como "a comunidade autónoma marítima por excelencia", defenden o texto elaborado pola Xunta e referendado polo Parlamento; e reclaman ao Goberno central "o inmediato traspaso de medios materiais e persoais" para poder xestionar as concesións do dominio público marítimo-terrestre.

O texto foi feito público en tres actos celebrados noutros tantos puntos da costa galega. En Pontevdra, a secretaria xeral do PPdeG, Paula Prado, estivo xunto ao presidente da Deputación pontevedresa e líder provincial, Luís López, na Praza do Concello de Cambados; mentres que na Coruña, o máximo responsable do partido na provincia, Diego Calvo, compartiu a lectura en Malpica coa conselleira de Medio Ambiente, Ángeles Vázquez. En Lugo, o acto tivo lugar en Viveiro con presenza da presidenta do PP lugués, Elena Candia, e o conselleiro do Mar, Alfonso Villares.

O manifesto dos populares celebra o aval por unanimidade do TC á Lei de ordenación do litoral, "unha norma feita por e para Galicia, que aposta por unha xestión integrada desde unha tripla perspectiva: ambiental, social e económica, seguindo o camiño que marca Europa". Incide en que o seu obxectivo é "a xestión sustentable" da costa "tanto no ambiental como no socioeconómico, promulgada desde onde mellor se coñece", o propio territorio galego, un lugar "que non se entende sen a súa costa" e que dispón "dun dos ecosistemas mariño-costeiros máis variados e ricos do mundo" acompañado dunha "beleza paisaxística excepcional".

O PP remarca que do mar dependen en Galicia 40.000 postos de traballo e 9.000 millóns de euros de actividade económica, "case o 5% do PIB da comunidade". "Unha costa única no mundo e que Galicia quere e pode xestionar, xa que conta desde hai anos coas competencias de ordenación. Así o recoñece o noso Estatuto de Autonomía, e así o ratificaron o Consello Consultivo e o Tribunal Constitucional", engade.

Así as cousas, incide en que o respaldo xudicial abre un escenario no que é preciso "recuperar os meses perdidos" dos que responabiliza a "un recurso máis político que xurídico" presentado polo Goberno central que ven "un claro exemplo da diferenza de trato a Galicia con respecto a outras comunidades, coas que si dialogou e chegou a acordo, como Cataluña, Illas Baleares e o País Vasco".

"A sentenza do Alto Tribunal avala que a norma galega é plenamente constitucional, fronte a todos os que a definiron como unha auténtica declaración de independencia. Deixa claro que non é necesario reformar o noso Estatuto e pon de manifesto a pouca altura de miras da oposición galega, BNG e PSOE, que deixaron pasar a oportunidade de apoiar unha norma vital para Galicia e para o seu desenvolvemento, só por buscar rédito político", aseveran os populares galegos.

Así as cousas, o PP subliña que "é o momento de achegar seguridade xurídica ás empresas e á cidadanía, e de pór fin a situacións incomprensibles que tratan de borrar toda presenza humana no litoral", polo que reclama ao Executivo que proceda ao traspaso "inmediato" dos medios materiais e persoais para xestionar as concesións en dominio público marítimo-terrestre.

Cargos do PP de Galicia, coa súa secretaria xeral á cabeza, Paula Prado, dan lectura a un manifesto sobre a Lei do litoral en Cambados (Pontevedra). PP | Fonte: Europa Press