A Xunta insta o Goberno a apoiar o proxecto de Altri

O conselleiro de Emprego, José González, emprazou ao Goberno central a apoiar o proxecto de Altri na comarca da Ulloa para demostrar o seu compromiso co emprego industrial na comunidade galega. A preguntas dos xornalistas este xoves en Santiago no marco dunha serie de encontros con representantes sindicais, González subliñou que Galicia ten "unha pedra de toque importante" no fomento dos empregos vinculados á industria.

"Hai un proxecto industrial de moita transcendencia para Galicia que está a demandar o apoio da Administración central do Estado", aseverou nunha alusión velada ao proxecto Altri. Ademais, tamén instou ao Goberno a permitir que se apliquen as políticas activas de emprego con atención ás "especificidades" de cada territorio, polo que demandou "máis capacidade" de acción para as comunidades. "Sería bo que se deixasen de tanto centralismo no que se refire a estas políticas activas", incidiu o conselleiro, que subliñou que a Xunta ten "ideas" e "ganas de colaborar cos sindicatos e a patronal".

Imaxe de Altri | Fonte: Podemos - Arquivo