Dez detidos por 13 roubos, estragos e pertenza a grupo criminal en varios municipios da Coruña

Axentes do equipo Roca de Santiago de Compostela, en colaboración con varias unidades da Garda Civil, detiveron a dez persoas por 13 delitos de roubo, un de estragos e pertenza a un grupo criminal no marco da denominada operación Copperberry que actuou en varios municipios da provincia da Coruña.

A operación iniciouse a raíz do roubo de cable do tendido telefónico na localidade coruñesa de Noia o día 9 de xaneiro deste ano. No marco da investigación, os integrantes do Equipo ROCA pescudaron que os presuntos autores formaban un grupo criminal itinerante especializado na subtracción do cableado do tendido telefónico en zonas rurais de toda a xeografía española. Este grupo, explica a Garda Civil, "atopábase perfectamente estruturado e xerarquizado" e dividíase en células para realizar estas actividades ilícitas. Os vehículos utilizados nos seus desprazamentos pertencían a empresas de aluguer, co que pretendían entorpecer o labor investigador e a súa localización.

O modus operandi consistía no estudo da zona e de posibles vías de escape. Unha vez planificado, á noitiña, desprazábanse ó lugar seleccionado nunha furgoneta, á cal precedía un turismo que actuaba como lanzadeira para informar de posibles controis policiais. Unha vez no punto, cortaban os cables do tendido en anacos de 1,60 metros e introducíanos nos vehículos, abandonando o lugar para trasladarse a localidades afastadas, onde os seus integrantes queimaban o material subtraído nunha zona illada para retirar o recubrimento e quedar coa parte metálica.

Ademais, grazas á colaboración cidadá, os investigadores puideron localizar en Arzúa unha liña telefónica saboteada e achar as ferramentas utilizadas para o corte do tendido e varias pilas de cable xa cortado, apilado ao longo do camiño adxacente. Tras o achado, a Garda Civil estableceu un dispositivo de vixilancia na zona, que deu os seus froitos ó sorprender catro dos integrantes cando se dispuñan a recoller parte do cable preparado para o seu transporte. Unha vez detidos, localizáronse no seu turismo seccións de cable, ferramentas, luvas e indumentaria para a comisión dos roubos.

A estas dez persoas considérallas presuntos autores de 13 delitos de roubo, un delito de estragos, un delito de pertenza a grupo criminal e un delito de apropiación indebida por non devolver un dos vehículos de aluguer no prazo establecido. Unha vez detidos os presuntos autores, a Garda Civil centrou os seus esforzos na localización dos puntos de venda do material subtraído. E grazas á colaboración do Centro de Cooperación Aduaneira (CCPA) de Tui, puideron acreditar a venda do mesmo en chatarrerías de Portugal.

Detidos 10 homes como presuntos autores de 13 delitos de roubo, 1 delito de estragos, 1 delito de pertenza a grupo criminal | Fonte: GARDA CIVIL - Europa Press