O BNG denuncia que a Xunta rexeitou as matrículas a unhas 30 familias de Ferrolterra nos centros da súa elección
O deputado Mon Fernández piden que se lles garanta "un dereito fundamental de escolarizar aos seus fillos nas súas localidades".
Por Europa Press / Redacción | Ferrol | 30/05/2024 | Actualizada ás 14:06
O deputado autonómico do BNG Mon Fernández denunciou que aproximadamente unhas 30 familias de centros escolares de Ferrolterra sufriron "a inadmisión de solicitudes de matrícula nos colexios onde reservaron praza".
Nunha rolda de prensa ofrecida na mañá deste xoves en Ferrol, acompañado de representantes do BNG de varios municipios afectados, ademais de pais e nais, Fernández detallou que entre os centros afectados están os colexios de Atios, en Valdoviño; Os Casais, Fene; Santa María, nas Pontes; Mosteiro de Caaveiro, na Capela e O Laxe, en Ferrol.
"Esta é unha cuestión coa que está a xogar a Xunta, deixar que a xente se busque a vida para que, chegado o momento, os problemas redúzanse ao mínimo posible", detallou o deputado, que criticou que desde a Inspección "a resposta está a ser a mesma, que xa veremos en xuño se se soluciona". Isto, dixo, provoca "unha preocupación" para os pais e "motiva que algúns busquen a solución con matrículas noutros centros" doutras localidades.
NOVAS COCIENTES
"Isto é absolutamente intolerable, sobre todo cando se pon de escusa a aplicación do decreto de xaneiro deste mesmo ano, de redución de cocientes", apuntou o nacionalista, para quen "esta opción se vendeu aos catro ventos como unha marabilla, a redución de cocientes, de mellora da calidade do ensino, e agora resulta que se fai unha interpretación na que non se desdobran aulas e non se contrata máis persoal", porque "simplemente o fácil é inadmitir as solicitudes porque non hai vacantes".
Así, o deputado autonómico cualificou a situación de "inadmisible" e avanzou que o BNG rexistrou diversas iniciativas no Parlamento de Galicia para dar a coñecer o problema da comarca, que serán "abordadas a próxima semana".
