9X- A crónica da romaría do PP no Pino: máis de 4.000 persoas e políticos brindando na barra do bar
A lei de amnistía ou o sector primario centraron os discursos dos populares.
Por Europa Press / Redacción | SANTIAGO | 01/06/2024 | Actualizada ás 18:53
A carballeira da Madalena, no municipio coruñés do Pino, acolleu un ano máis a tradicional romaría dos populares galegos, que nesta ocasión serviu como mitin central do PP no ecuador da campaña das eleccións europeas e no que participaron o presidente do PP nacional, Alberto Núñez Feijóo, a presidenta da Comisión Europea, Ursula Von der Leyen e a candidata do PP ás eleccións europeas, Dolors Montserrat, ademais do líder do PPdeG, Alfonso Rueda, e outros cargos do partido.
'Welcome to Coruña, Ursula, welcome to Galicia', así recibiron a Von der Leyen na área recreativa na que sobre as 13.00 horas xa esperaban os máis de 4.000 militantes e simpatizantes populares, segundo os organizadores, que un ano máis non fallaron á cita do PPdeG. Entre pantallas co lema 'Europa é a resposta', varias carpas estaban xa preparadas para albergar a comida que tras a intervención dos políticos populares poderían degustar os asistentes. Para amenizar a xornada, un grupo musical, co que algúns xa se animaron a botar os primeiros bailes, tocaba as súas primeiras cancións antes do acto.
Así, pouco antes das 13.30 horas o alcalde do Pino, Manuel Taboada, daba a benvida aos asistentes desde o atril situado nun lateral da capela da Madalena polo que pasaron a continuación o presidente dos populares coruñeses, Diego Calvo, o presidente do PPdeG, Alfonso Rueda, a candidata Dolors Montserrat, Alberto Núñez Feijóo e, por último, Ursula Von der Leyen.
Rueda pediu aos seus facer "o mesmo esforzo" que en anteriores eleccións, mentres que Feijóo aproveitou a súa intervención para agradecer á presidenta da CE que se "comprometa" co Estado de Dereito español tras a "gran estafa electoral" do Goberno de Pedro Sánchez coa lei de amnistía. Por último, Von der Leyen, aínda que sen citar explicitamente a palabra amnistía, garantiu que Europa "actuará" se se pon en risco o Estado de Dereito en España.
MÚSICA E COMIDA
Tras os discursos volveu soar a música e tanto os asistentes como os políticos dirixíronse cara á barra do bar situada para a ocasión na carballeira. Alí, Rueda exerceu de anfitrión coa presidenta da Comisión Europea e ambos, xunto con Diego Calvo, Dolors Montserrat, Esteban González Pons ou Alberto Núñez Feijóo (que se uniu minutos máis tarde), entre outros, brindaron cunha cana ante a mirada dos fotógrafos que capturaron a instantánea. Despois chegou o momento de desprazarse cara ás carpas instaladas na parte superior da carballeira onde, previa parada cos pulpeiros, os asistentes puideron comer un menú con empanada, polbo e carne 'ao caldeiro'.
