Xunta e Endesa reúnense cando está a piques de comezar o desmantelamento da central térmica das Pontes

A conselleira de Economía e Industria, María Jesús Lorenzana, convocou para este martes unha reunión de traballo con Endesa para facer un seguimento do inicio da fase de desmantelamento da central térmica das Pontes de García Rodríguez e da continuidade dos empregos vinculados. Este encontro, que se enmarca dentro da Mesa para o Impulso da Actividade Económica das Pontes, terá lugar en Santiago a partir das 18.00 horas. A el están convocados os representantes sindicais, a administración local e autonómica e Endesa.

"O obxectivo é abordar o estado no que se atopa nestes momentos o plan de traballo das tarefas de desmantelamento da térmica, que están a piques de empezar, e conseguir garantías de continuidade laboral para os traballadores das empresas auxiliares, que deberán acometer o cronograma de accións acordado para os próximos meses", indicou a Xunta nun comunicado. Lorenzana insistiu na necesidade de compasar as tarefas de desmantelamento da central cos proxectos industriais e enerxéticos nos que se está traballando desde o Goberno galego, tras o "peche imposto polo Goberno central o pasado mes de agosto".

Os camións do carbón da central de Endesa nas Pontes bloquean os accesos | Fonte: Arquivo