A calidade turística, obxectivo prioritario de Turismo de Galicia no horizonte 2030
A Xunta mantén aberta ata o 24 de xuño a liña de axudas de máis de 2 millóns para centros comerciais abertos.
Por Europa Press / Redacción | SANTIAGO DE COMPOSTELA | 13/06/2024 | Actualizada ás 14:23
O director de Turismo de Galicia, Xosé Merelles, apunta á calidade turística como "obxectivo prioritario" no horizonte 2030, tal e como se recollerá na estratexia turística que ultima para os próximos anos. Na Comisión 6ª de Industria, Enerxía, Comercio e Turismo do Parlamento galego, Merelles deu conta do plan de calidade turística 2024 da Xunta, xa presentado o pasado mes de abril e que ten un investimento de máis de medio millón de euros. O obxectivo é sumar 20 novas marcas Q de Calidade e 80 de S de Sustentabilidade en establecementos no Camiño de Santiago durante estes anos.
En resposta a unha pregunta do PPdeG, expuxo vanse a promover estas certificacións en espazos do Camiño: oficinas de información turística, museos, instalacións náutico-deportivas, praias, transporte turístico, espazos naturais protexidos e albergues. Así mesmo, subliñou que, nos catro primeiros meses deste ano, un total de 1,3 millóns de viaxeiros aloxáronse en establecementos turísticos galegos, cun crecemento do 5 % dos viaxeiros de turistas estranxeiros.
CENTROS COMERCIAIS ABERTOS
Por outra banda, o director xeral de Comercio e Consumo, Gabriel Alén, informou de que xa se comezaron a recibir e tramitar as axudas por máis de 2 millóns para a dinamización dos centros comerciais abertos, unha liña aberta a finais de maio e cuxo prazo termina o 24 de xuño.
As achegas máximas desta convocatoria poderán alcanzar os 52.000 euros e destinarse a actuacións de dinamización comercial, fidelización de clientela, dixitalización ou para o mantemento da unidade xerencial. Os centros comerciais abertos deben ser dunha única asociación de comerciantes e específicos dentro de espazos urbanos.
