O IES de Nosa Señora dos Ollos Grandes, o colexio La Salle e a USC, gañadores do XV Parlamento Xove

O IES de Nosa Señora dos Ollos Grandes, o colexio La Salle e o equipo un da Universidade de Santiago foron os gañadores da XV edición do Parlamento Xove. A clausura deste concurso tivo lugar este venres e nela participou o presidente do Parlamento de Galicia, Miguel Ángel Santalices, e a directora xeral de Xuventude, Laura Meneses.

Na súa intervención, Santalices afeou a "politización" actual do debate político e enxalzou a dialéctica dos participantes neste programa. Neste sentido, sinalou que "non lle gusta" a linguaxe que moitas veces usan os políticos xa que é "provocadora e impropia dun representante público e dun Parlamento".

"Coidado coa polarización e respectemos sempre as normas democráticas", sinalou á vez que fixo referencia a un dos puntos do Parlamento Xove que versou sobre a xeración de cristal. Por iso, mostrouse seguro de que a xeración actual é "tolerante" e ser así "resulta fundamental" para superar a polarización. Finalmente, enxalzou aos participantes e incidiu en que se "vai satisfeito" porque o Parlamento de Galicia, para o seu futuro, "ten canteira".

Pola súa banda, a directora xeral de Xuventude, Laura Meneses, mostrouse "asombrada e encantada" de poder escoitar aos mozos e remarcou que espera que este programa se realice "moitos anos máis". Neste sentido, apuntou que, a algúns dos participantes de edicións pasadas deste programa, serviulles "para a vida" independentemente do sector no que desenvolvesen a súa actividade laboral. "Serviulles para gañar confianza e sobre todo para aprender a escoitar", afirmou.

Pleno infantil | Fonte: PARLAMENTO DE GALICIA - Arquivo