Abre este sábado a solicitude de axudas para universitarios que se vaian de intercambio fóra do programa 'Erasmus+'
Estas subvencións serán de 1.700 euros para intercambios dentro de Europa e de 2.500 cando sexan noutro lugar do mundo.
Por Europa Press / Redacción | SANTIAGO DE COMPOSTELA | 21/06/2024 | Actualizada ás 17:37
A Consellería de Educación, Ciencia, Universidades e FP abrirá este sábado o prazo dun mes, que concluirá o luns 22 de xullo, para pedir as axudas da Xunta para aqueles alumnos de grao das universidades públicas de Galicia que o próximo curso 2024/25 participen en programas de mobilidade con países extracomunitarios, fóra do ámbito do programa 'Erasmus+'.
En concreto, coa publicación este venres da orde no Diario Oficial de Galicia (DOG), iniciarase o prazo para que os estudantes poidan formular a súa solicitude, na sede electrónica da Xunta, destas subvencións que serán de 1.700 euros para intercambios dentro de Europa e de 2.500, cando sexan noutro lugar do mundo.
Requirirase que o alumno estea matriculado nun grao dunha universidade pública de Galicia, que o próximo curso fagan un programa de mobilidade fóra do 'Erasmus+' e que non fosen beneficiarios desta bolsa en convocatorias anteriores. Non poderán percibir esta axuda os estudantes que teñan unha nacionalidade distinta á española, ou a dobre, e que realicen a mobilidade nos seus países de orixe.
