A Xunta será "solidaria" na repartición de menores migrantes, pero reclama medidas para frear a "avalancha"

O presidente da Xunta, Alfonso Rueda, confirmou que Galicia será "solidaria" na repartición de menores migrantes que se abordará este mércores entre as comunidades autónomas e o Goberno central, pero reclamou que esta solidariedade debe "acompañarse de medidas" que contribúan a frear a "avalancha". Ao ser preguntado respecto diso na rolda de prensa posterior á reunión semanal do seu Executivo, Rueda recoñeceu que se trata dun "tema delicado" no que hai que aplicar "máis que nunca o 'sentidiño'", porque é "un problema social".

Neste contexto, recalcou que Galicia "sempre foi unha terra solidaria", pero afeou que o Goberno central non teña "ningunha política" concreta en inmigración. O titular da Xunta afeou que o Estado pretenda derivar este asunto ás autonomías para ver se "así se soluciona o problema". "Pero non se vai a solucionar, vai ser unha cuestión permanente", engadiu, para reforzar a súa petición de que se deben "previr" e "regular" estas "avalanchas" a futuro. Para Alfonso Rueda, a repartición de menores que se abordará o mércores na Conferencia Sectorial de Inmigración é unha medida "improvisada".

NON SE PRONUNCIA SOBRE A AMEAZA VOX

O presidente galego tamén foi preguntado sobre a ameaza de Vox de romper os pactos co PP naquelas comunidades nas que gobernan xuntos, no caso de que se acepte a repartición destes menores na Conferencia Sectorial. Con todo, Rueda non se pronunciou sobre este órdago dos de Santiago Abascal e limitouse a dicir que se "alegra moito de non ter os extremismos na política galega" ou que, polo menos, son "minoritarios". 

PALABRAS DE TELLADO

Así mesmo, foi interpelado sobre as palabras do portavoz do PP no Congreso, Miguel Tellado, da semana pasada, nas que propuxo despregar á Armada Española para evitar a chegada de embarcacións ás Illas Canarias. No entanto, o presidente da Xunta descarta que estas declaracións signifique "impedir" ou "facer dar a volta" a eses barcos, senón que se trata de exercer un "control".

"O que non pode ser é que non haxa ningún control sobre as nosas fronteiras. Iso non quere dicir que (despregar a Armada) sexa para que non chegue ninguén, senón que sexa para regulalo", explicou Rueda. O mandatario galego cre que é "algo normal" que fan "outros países" porque "o contrario é o que está a pasar agora", onde hai unha chegada "absolutamente libre".

O PP ENDURECE O DISCURSO E APUNTA AOS MENORE MIGRANTES

O portavoz do Partido Popular, Borja Sémper, cualificou de "extraordinariamente frívola" a política de migración do Executivo de Pedro Sánchez, ao que acusou de tratar aos menores migrantes non acompañados como "paquetería exprés", á vez que esixiu "garantías" para as comunidades ás que se destinen. É máis, alertou de que unha posible "sobresaturación" deses menores provoque "problemas de orde pública".

Así se pronunciou Sémper en declaracións aos medios en Almería antes da inauguración dos cursos de verán da Universidade de Almería, dous días antes da Conferencia Sectorial de Infancia e Adolescencia que se celebrará en Tenerife entre Goberno e CCAA para tratar esa repartición dos menores migrantes.

Sémper asegurou que o Goberno "trata a política de inmigración dunha maneira extraordinariamente frívola" e, "singularmente trata aos menores non acompañados como mercadoría, como paquetería exprés".

PREGUNTA A ALBARES QUE ESTÁ A FACER PARA QUE ACTÚE FRONTEX

En concreto, reclamou ao ministro de Asuntos de Exteriores, José Manuel Albares, que diga que está a facer en Europa "para que Frontex actúe, por exemplo, no control das augas internacionais". "Entendemos que non está a facer nada", criticou.

Ademais, Sémper subliñou que o Goberno ten que ofrecer "garantías" de que os menores que están dispostos a acoller as comunidades gobernadas polo PP contarán con recursos materiais e económicos porque, se non é así, non serán "capaces de abordar o problema na súa complexidade".

Segundo o portavoz do PP, a política de inmigración do Goberno de Pedro Sánchez é "un desastre e é pancarteira". Ao seu entender, se en "ningún tema" nin "en ningunha xestión complexa" a política ten que ser de "pancarta", "moito menos en materia de migratoria" porque están "a falar de seres humanos".

REUNIÓN DO GOBERNO COAS CCAA ESTE MÉRCORES

O Goberno central abordará este mércores coas comunidades autónomas na Conferencia Sectorial de Infancia e Adolescencia a repartición de menores migrantes non acompañados entre os territorios. A reunión terá lugar en Tenerife, coa incógnita de se o PP apoiará a reforma da Lei de Estranxeiría que propón o Executivo e tras as ameazas de Vox aos 'populares' de romper os seus pactos autonómicos.

O principal obxectivo do encontro será abordar a reforma do artigo 35 da Lei de Estranxeiría para que as comunidades autónomas acollan a nenos migrantes non acompañados de forma "solidaria e vinculante" cos territorios de chegada. Canarias ten actualmente preto de 6.000 menores e a proposta do Executivo é que o tope contemplado estea entre 2.000 e 3.000.

Segundo aseguraron fontes ministeriais a Europa Press, a reunión estará presidida pola ministra de Mocidade e Infancia, Sira Rego, que estará acompañada polo ministro de Política Territorial e Memoria Democrática, Ángel Víctor Torres, e polo presidente de Canarias, Fernando Clavijo. Así mesmo, confirmaron a asistencia as comunidades gobernadas polo PP aínda que algunhas acudirán de forma presencial e outras remota.

Este luns, Abascal avisou de que considerarán "rotos" todos os pactos autonómicos co PP se desde os gobernos autonómicos nos que participan non utilizan "todos os medios políticos e legais" para evitar a distribución de menores migrantes. Así, Vox vinculou aos menores migrantes co aumento da delincuencia e subliñou que, se o PP e os seus gobernos autonómicos aceptan a repartición destes menores, Vox romperá os pactos e abandonará eses executivos.