A Xunta pide un reforzo dos servizos de proximidade ferroviaria ttal e como pide CC.OO.
Por E.P. | SANTIAGO DE COMPOSTELA | 10/07/2024 | Actualizada ás 12:43
O conselleiro de Presidencia, Xustiza e Deportes, Diego Calvo, trasladou o apoio da Xunta ás reivindicacións do sector ferroviario para pedir ao Goberno o reforzo dos servizos ferroviarios de proximidade. Diego Calvo, coa directora xeral de Mobilidade, Judit Fontela, reuniuse con representantes do sector ferroviario de CC.OO. na provincia de Pontevedra, encabezados polo seu secretario xeral, Antón Conde, para escoitar as súas demandas e necesidades, entre elas a creación dunha rede de trens de proximidade como existen noutras comunidades.
Tal e como trasladaron no encontro, e apuntou a Xunta nun comunicado, a proposta do sindicato pretende dar unha resposta intermodal que cubra as necesidades do territorio e ofreza un servizo transfronteirizo con Portugal.
O Goberno galego sinalou que manifestou en varias ocasións a detención por parte do Executivo estatal cos servizos de proximidade, que serían clave para mellorar a mobilidade, neste caso no sur e interior da provincia de Pontevedra.
De feito, indicou que a Xunta reclamou ao Goberno central un estudo de alternativas para a implantación de trens de altas prestacións que conecten coa rede estatal e co obxectivo de sacar o máximo proveito da chegada do AVE.
Así, apuntou que para a Administración autonómica unha rede de proximidade entre Vigo e Pontevedra suporía pór en marcha máis trens e frecuencia continua reducindo o tránsito por estrada como ocorre cos servizos de proximidade no Eixo Atlántico Vigo-A Coruña, aínda que a Xunta tamén leva demandando desde hai tempo ao Ministerio de Transportes e Mobilidade Sustentable melloras nestes trens de media distancia.
