Muros aproba os seus primeiros orzamentos municipais desde 2021, que ascenden a máis de 9,4 millóns de euros
O goberno bipartito avanza que haberá contas anuais ata o final do mandato.
Por Europa Press / Redacción | SANTIAGO DE COMPOSTELA | 10/07/2024 | Actualizada ás 18:39
O pleno municipal de Muros aprobou este mércores os orzamentos municipais do ano 2023, que ascenden a máis de 9,4 millóns de euros. Serán os primeiros deste Concello "desde o ano 2021", tal e como destaca a alcaldesa, María Lago. A proposta contou co voto a favor das dúas formacións que compoñen o goberno, BNG e PSdeG, mentres que o PP e Muros Centrado optaron polo 'non'. O bipartito dá por feito que haberá contas ano a ano, ata o final do mandato. Segundo subliña a rexedora, os orzamentos contan cun "claro acento social". O seu tenenta de alcaldesa, a socialista Caridade González, engade que permiten "solucionar a carencia de persoal" coa que se atoparon ao chegar ao goberno, "ademais de abonar numerosas facturas de provedores que levaban case un ano de atraso".
Dentro das contas dese ano, o Concello destaca nun comunicado os máis de 1,2 millóns de euros destinados a investimentos reais, un 13,25% do total, para realizar obras e actuacións que mellorarán os servizos e infraestruturas "en todas as parroquias".
Ademais, unha partida superior aos 2 millóns de euros, o 21,7% do total, será para bens correntes e servizos como o de axuda no fogar (SAF). O bipartito sostén que "reforzará todas as medidas sociais e de apoio á conciliación". Tamén destacan máis de 1,2 millóns de euros para facer fronte ao "importante aumento" das cotas de recollida de lixo na Mancomunidade da Serra de Barbanza.
A partida de persoal, pola súa banda, serán máis de 4,5 millóns de euros, que prevé a actualización dos salarios conforme á normativa estatal. As prazas contemplan a reposición do persoal que se xubila e reforzos en Policía Local, limpeza viaria, obras e auxiliares do SAF.
En definitiva, reivindica a alcaldesa, é un orzamento "social e realista", pensado "por e para os veciños e veciñas de Muros, que recollen na medida do posible as demandas da veciñanza e das distintas entidades" do tecido asociativo do municipio, xunto cun "plan de mellora continua de todos os servizos e infraestruturas públicas".
