A Deputación de Lugo envía aos municipios ordenanzas tipo para a creación de normativas locais sobre transparencia

O presidente da Deputación de Lugo, José Tomé Roca, trasladou a todos os alcaldes e alcaldesas da provincia unha carta a través da cal lles fixo chegar diferentes documentos de utilidade municipal como ordenanzas tipo para a creación de normativas locais sobre transparencia e recollida de residuos. Segundo informou a institución provincial, envioulles información sobre o impacto da reactivación das regras fiscais nos orzamentos locais de 2024, unha ordenanza tipo de transparencia pública e outro marco da recollida de residuos.

Estes arquivos, que foron recollidos polo mandatario provincial na última reunión da Federación Española de Municipios e Provincias (FEMP) celebrada en Sevilla o pasado mes de xullo e na que participou, "poden ser de interese para os concellos". En concreto, a información sobre o impacto da reactivación das regras fiscais nos orzamentos locais de 2024 inclúe tamén cuestións como cal é o obxectivo de regra de gasto deste ano ou que deben facer as entidades locais en caso de pechar o presente exercicio con déficit.