O PSdeG denuncia que a Xunta "asfixia" aos institutos ao implantar ciclos de FP "sen dotalos de financiamento"

A deputada socialista Paloma Castro denunciou este luns que a Xunta "asfixia" a moitos institutos de secundaria de Galicia ao implantar ciclos de FP "sen dotalos dun maior financiamento". Así, tal e como trasladou o PSdeG nunha nota de prensa, son os propios centros os que "deben asumir o incremento de custos", polo que "detraen recursos destinados a ESO e bacharelato".

Tras manter unha reunión coa dirección do IES de Poio (en compañía do portavoz do PSdeG no Concello, Gregorio Agís, e da concelleira Silvia Díaz), Castro explicou que o ciclo medio de 'Guía no medio natural e tempo libre', que se imparte nesas instalacións, "consome o 40 % dos recursos do centro, cando conta con só 22 alumnos por cada un dos dous cursos".

Para a parlamentaria socialista, este é "un exemplo" do que, asegurou, ocorre noutros institutos de Galicia, porque o Goberno galego "desatende as necesidades dos ciclos a pesar de que recibe fondos europeos para o seu funcionamento". Nesta liña, Castro insistiu en que "non é de recibo" que a Xunta "se dedique a inaugurar ciclos e despois non o dote de financiamento", especialmente, engadiu, "cando no seu programa contan con materias custosas como Deportes Acuáticos ou Equitación.

Por todo iso, anunciou que o Grupo Socialista presentou unha serie de iniciativas no Parlamento a través das cales esixe á Xunta que poña a disposición dos centros afectados o financiamento "adecuado" e que os "dote do profesorado necesario". Ademais, no caso concreto do ciclo que se imparte no IES de Poio, demándalle que "garanta a súa continuidade".

A deputada do PSdeG Paloma Castro, en Poio | Fonte: PSDEG