A Xunta pide "claridade" ao Goberno para organizar a acollida de migrantes ante a previsión de que se superen os 1.000
Proceden de Canarias e, na súa maioría, foxen da guerra de Mali e contan con solicitude de asilo.
Por Europa Press / Redacción | SANTIAGO DE COMPOSTELA | 19/08/2024 | Actualizada ás 16:10
A Xunta reclama ao Goberno central "claridade" para organizar a acollida de migrantes procedentes de Canarias e que, na súa maioría, foxen da guerra de Mali e contan con solicitude de asilo, ante a previsión de que cheguen máis de 1.000. Fontes da Consellería de Política Social e Igualdade sinalaron que o Executivo galego segue informado a través do delegado do Goberno de novas chegadas a Galicia.
Con todo, lamentan que a cifra que manexaba a Consellería ao comezo da crise (máis de 700 persoas) era "moito máis próxima á realidade" que a que sostiña o Goberno central (470). Unha discrepancia, apuntan estas mesmas fontes, "que mesmo motivou unhas declaracións do delegado do Goberno acusando á conselleira, Fabiola García, de estar a aproveitar unha crise humanitaria para 'enredar'".
Así, o departamento autonómico estima que a previsión de chegadas a curto prazo supera as 1.000, polo que demanda "claridade" para poder organizar a acollida xa que, tal e como lembrou, "hai competencias exclusivas da administración autonómica como sanidade ou educación".
