O PSdeG denuncia o "agravamento" da sanidade tras un verán con incidencias "en toda Galicia"
Por E.P. | SANTIAGO DE COMPOSTELA | 01/09/2024 | Actualizada ás 12:43
O portavoz de Sanidade da Executiva do PSdeG, José Manuel Miñones, expresou a súa "profunda preocupación" polo "agravamento" da situación sanitaria en Galicia e denunciou que a situación nos centros sanitarios "segue empeorando".
Miñones sinalou que, ao longo deste verán, a sanidade "sufriu unha notable degradación, con menos médicos camas pechadas e centros de saúde clausurados", o que levou a unha "situación de colapso" nas urxencias e un "aumento nas incidencias e crises sanitarias".
"É evidente que o sistema sanitario galego está desbordado e esta non é unha situación recente, senón que leva anos deteriorándose", afirmou. Así, cualificou a xestión do PP en materia sanitaria como "errónea" e que "carece de políticas efectivas". "A falta de blindaxe do sistema sanitario e os recortes continuos deixaron a Galicia nunha situación critica", esgrimiu.
Miñones lembrou que antes do inicio do verán, o PSdeG presentou un plan de renovación sanitaria que "foi ignorado" polo Executivo galego. En referencia á "falta de médicos", destacou a "necesidade urxente" de "incrementar os salarios" dos profesionais para que Galicia "deixe de ser" unha das comunidades que "peor paga", e así poder "atraer e reter" máis médicos en formación.
Por todo iso, os socialistas esixiron ao presidente da Xunta, Alfonso Rueda, que "non demore máis" a implementación de medidas urxentes, incluíndo un aumento nos salarios e un plan de choque para reducir a burocracia nos centros de saúde.
