O BNG pedirá aclaracións sobre a caída de parte do teito do novo edificio de hospitalización do CHUO

O Bloque Nacionalista Galego, a través do seu grupo parlamentario, rexistrou unha batería de iniciativas no Parlamento para dilucidar cales foron as causas da caída do teito do novo edificio de hospitalización do Complexo Hospitalario Universitario de Ourense (CHUO).

Os nacionalistas lembraron que o pasado venres 30 de agosto o edificio de construción máis recente sufriu unha fuga de auga, que derivou na inundación do vestíbulo e no desprendemento do falso teito da zona de entrada.

A deputada Noa Presas celebrou que, "afortunadamente, o incidente non causou ningún tipo de dano persoal", unicamente material, sen causar tampouco afectación á actividade asistencial.

Con todo, lembrou que fai menos dun ano tamén se desprendeu o falso teito do edificio materno infantil, "causando dificultades para prestar determinados servizos fundamentais na área de partos e xinecoloxía" durante varias semanas, xa que a reparación "demorouse máis de seis meses".

Para o BNG este incidente nun edificio "de recente construción, posto que ten menos dunha década", súmase aos "constantes problemas de mantemento" doutras zonas do hospital ourensán e "fai saltar as alarmas na poboación", polo que requiren explicacións adecuadas por parte do Goberno galego.

Neste sentido, Presas considera que é necesario aclarar as razóns do incidente, saber se eran evitables, se corresponden a un defecto na construción ou se as medidas de mantemento foron as adecuadas e, de non ser así, "tomar as medidas para que non volva suceder".

Así mesmo, os nacionalistas queren saber "as conclusións da investigación levada a cabo, se a houbo", para saber se se trata dun feito puntual ou de consecuencias de deficiencias na execución da obra, porque nese caso "poderían provocarse máis incidentes no futuro se non se detectan e corríxense a tempo".

A deputada do BNG, Noa Presas | Fonte: BNG - Arquivo