Vigo, o único aeroporto galego que rexistra cifras de viaxeiros positivas en agosto, cun incremento do 0,4 %
O número de pasaxeiros aumentou un 0,4 % en agosto no aeroporto de Vigo, fronte ao descenso rexistrado nos aeroportos de Santiago de Compostela e A Coruña, un 4,5 % e un 6,2 %, respectivamente.
Por Europa Press / Redacción | VIGO | 12/09/2024 | Actualizada ás 14:24
O número de pasaxeiros aumentou un 0,4 % en agosto no aeroporto de Vigo, fronte ao descenso rexistrado nos aeroportos de Santiago de Compostela e A Coruña, un 4,5 % e un 6,2%, respectivamente. O da Coruña rexistrou o pasado mes de agosto un total de 103.188 pasaxeiros, un 6,2 % menos que no mesmo mes de 2023. Dos pasaxeiros de voos comerciais (103.148), 91.725 realizaron traxectos nacionais e 11.423 internacionais.
En canto ao número de voos, o aeroporto coruñés rexistrou 1.262 operacións, dos que 782 foron voos comerciais, 695 a destinos nacionais e 87 a destinos internacionais. A terminal de carga do aeroporto da Coruña moveu, ao longo do pasado mes, 4,5 toneladas de mercadoría. No que vai de ano, acumulou un total de 816.674 pasaxeiros, 9.742 operacións e 35,5 toneladas de mercadoría.
Pola súa banda, o de Vigo pechou o pasado mes de agosto cun total de 116.760 pasaxeiros, un 0,4% máis que no mesmo mes de 2023. Do total de pasaxeiros comerciais (116.469), 111.232 usaron voos nacionais e 5.237, voos internacionais. Ademais, durante o pasado agosto 1.217 voos operaron na pista viguesa, dos cales 949 foron voos comerciais (879 a destinos nacionais e 70 a destinos internacionais). A terminal de carga do aeroporto de Vigo moveu en agosto 19,8 toneladas de mercadorías.
No que vai de ano, rexistrouse un total de 684.678 pasaxeiros, un 9,9 % menos que no mesmo período de 2023, "aínda que hai que ter en conta que en maio estivo operativo só seis días debido ás obras de reasfaltado da pista", recalca Aena. O de Santiago-Rosalía de Castro pechou o pasado mes de agosto cun total de 384.610 pasaxeiros (un 4,5 % menos que en agosto de 2023), dos cales 382.795 voaron en voos comerciais (282.871 en voos a destinos nacionais e 99.924 a destinos internacionais).
En canto ás operacións, o pasado mes o aeroporto compostelán rexistrou 2.704 voos (un 1,6% menos que en agosto de 2023), dos que 2.449 foron voos comerciais (1.782 a destinos nacionais e 667 a destinos internacionais). A terminal de carga compostelá rexistrou un total de 383 toneladas de mercadorías, un 5,8 % menos que en agosto do pasado ano. No que vai de ano, 2,5 millóns de pasaxeiros pasaron polas instalacións do aeroporto de Santiago-Rosalía de Castro. Nestes oito meses, operaron 18.665 aeronaves e pasaron pola terminal de carga 3.340 toneladas de mercadoría.
