Por Europa Press / Redacción | Lugo | 02/10/2024 | Actualizada ás 15:07
O conselleiro de Facenda e Administración Pública, Miguel Corgos, reuniuse en Bruxelas co director xeneral adxunto en funcións e director da Comisión Europea para a execución dos fondos estruturais en España, Nicola de Michelis, a quen presentou unha execución de "máis do 100%" dos fondos de cohesión no marco do período 2014-20.
En declaracións á prensa tras o encontro, Corgos explicou que o propio De Michelis puido "comprobar" estes datos. "E deunos o parabén por iso, porque é moi importante presentar un bo cartón de execución dos fondos cando queres reclamar máis fondos", afirma.
Remarca que Galicia utilizou desde o ano 1986 máis de 32.000 millóns de euros de fondos europeos, dos cales o 65% son fondos de cohesión. "E utilizámolos ben, porque os utilizamos para converxer: fomos a segunda rexión de España que máis converxeu desde o ano 2000 ata o 2022", valora.
Igualmente, Corgos trasladou a De Michelis a súa "preocupación" polo deseño do novo período do marco plurianual ante o que considera "un movemento centralizador dos fondos, copiando un pouco o estilo do mecanismo de Recuperación".
En sentido, o conselleiro de Facenda da Xunta defendeu que "é fundamental que Galicia poida seguir executando e deseñando as medidas dos seus fondos de cohesión para cumprir plenamente cos obxectivos que deseña Europa, pero focalizadas ás necesidades do territorio galego", dado que un deseño a nivel central "non é tan efectivo para resolver" problemas. Unha idea de "protagonismo activo" das comunidades na execución dos fondos de cohesión do futuro que exporá nunha intervención no Parlamento Europeo este mesmo mércores sobre esta temática. Deixa claro que "as políticas de cohesión son importantes, non deben verse mermadas no futuro do orzamento europeo".
DEBATE SOBRE MODERNIZACIÓN DE FONDOS
Cuestionado sobre a recepción da Comisión Europea respecto destas reivindicacións, Corgos apunta que lle confirmaron que "efectivamente existe ese debate na Comisión". "É importante que fagamos o que fixemos nós, que é presentarche cunha carta de presentación de 'eu cumprín cos meus obxectivos e coa execución", di, de cara á reclamación de máis fondos futuros.
A preguntas sobre o debate de fondo de que se vinculen fondos europeos a reformas e investimentos, Corgos respondeu que a Xunta está disposta a adaptarse a unha "mondernización" destas partidas, cunha "orientación máis a resultados". "Non imos opornos nin a ter unha posición, digamos, estática de que non queremos que cambie nada. Nós queremos participar na evolución da política de cohesión sempre que se manteña o seu peso e sempre que nós teñamos un papel activo no deseño das políticas e na súa execución", asevera.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.