O Concello de Ferrol subirá o IBI en 2025 ante a "falta de remanente" na tesourería municipal

O alcalde de Ferrol, José Manuel Rey Varela (PP), trasladou que a Xunta de goberno local extraordinaria celebrada no mediodía deste venres aprobou a proposta de modificación de ordenanzas fiscais para o ano 2025, que recolle a conxelación de todos os impostos menos un deles, o Imposto de Bens Inmobles (IBI), que se incrementa.

"Este Goberno ten que adoptar esta decisión responsable debido a unha mala xestión que vén arrastrando o Concello desde o 2015, ao estar sen orzamentos cada ano", detallou en rolda de prensa o rexedor 'popular'. Así, detallou que un informe da Intervención municipal de abril da 2023 alerta desta situación, e asegura que "se está case esgotando o remanente de tesouraría para gastos xerais dispoñible, cando se atopan sen cubrir con crédito necesario e suficientes compromisos debidamente adquiridos de contratos en vigor e outros gastos de persoal", e engadiu que a cidade leva sen actualizar as súas ordenanzas desde o ano 2015.

O IPC acumulado desde 2015 ata agora supón un incremento do 25,6%, unha subida que o goberno de Ferrol considera "excesiva" e "non poden pagalo os veciños pola mala xestión dos seus gobernantes", segundo Rei Varela. Por iso, o rexedor afirmou que "o goberno adoptou a decisión responsable de actualizar un único imposto de face a facer fronte aos retos que se presentan no ano 2025". Así, conxélanse o IBI rústico, o IAE, o ICIO, as plusvalías, a rodaxe e manteranse todas as bonificacións.

OPOSICIÓN

Por outra banda, os tres grupos na oposición xa valoraron de maneira negativa a subida de IBI das leiras e construcións urbanas. Así, o portavoz do PSOE, Ángel Mato, lamentou que "o Partido Popular decidiu pór por diante o equilibrio das contas municipais en lugar das necesidades reais dos veciños, especialmente nun contexto no que moitas familias seguen sufrindo os efectos da crise" e explicou que vén a sumar "á subida no recibo da auga, ao aumento do custo para as familias dos comedores escolares e a posible subida do recibo de lixo a causa do canon de Sogama".

Desde o BNG, Iván Rivas, o seu portavoz municipal, asegurou que esta proposta "é unha nova mostra da política retrógrada dun alcalde que ao mesmo tempo que lle mantén os privilexios ao Ministerio de Defensa, a Autoridade Portuaria ou ás concesionarias de servizos públicos nesta cidade, non para de subirlle os tributos aos veciños".

Por último, Jorge Suárez, portavoz de Ferrol en Común, asegurou que "ao nomeamento masivo de asesores, a subida do recibo da auga, súmase agora un 'catastrazo' que vai supor o incremento do recibo do IBI".

Rey Varela | Fonte: CONCELLO DE FERROL - Arquivo

CORREDOR ATLÁNTICO

Por outra banda, o conselleiro de Presidencia, Xustiza e Deportes, Diego Calvo, volveu a reclamar ao Goberno central que o futuro Corredor Atlántico ferroviario non deixe "descolgada" á cidade de Ferrol e corrixa a súa omisión na primeira proposta desta infraestrutura de transporte por mercadorías en tren.

Neste sentido, José Manuel Rey VAlreal propuxo este venres aos portavoces do tres grupos na oposición, PSOE, BNG e FeC, remitir unha carta ao ministro de Transporte e Mobilidade Sustentable, Óscar Puente, para expresarlle a súa "preocupación respecto á falta de investimentos do Estado nunha infraestrutura fundamental como é o tren, para poder mellorar as conexións co resto de cidades de Galicia e co resto de España, así como para finalizar o Eixo Atlántico Ferroviario", segundo detallou o rexedor.