A folga da CRTVG, indefinida a partir do mércores, volve provocar por cuarto día problemas na emisión da mañá

A cuarta xornada de folga na CRTVG, convocada polo Comité Intercentros, volveu a provocar problemas na emisión de 'O Termómetro', o programa que pon de exemplo da "externalización" que afronta a corporación. O comité, ademais, avanzou que o paro será indefinido a partir do 16 do mércores, pola "nula vontade da empresa de negociar para acordar unha saída ao conflito".

Nesta cuarta xornada de folga, os traballadores que a secundan fixeron un chamamento á cidadanía para que se "implique na defensa do servizo público de radiotelevisión" que, tal e como sinala o comité intercentros nun comunicado, está "secuestrada polo PP" que goberna a Xunta. O comité destacou que a externalización que "agrava a manipulación informativa" e o "desmantelamento programado dos medios públicos" volven estar no centro das súas denuncias.

Preguntada polo seguimento desta cuarta xornada de paro, a presidenta do Comité Intercentros e representante do comité de folga, Raquel Lema, destacou que este foi "superior" ao das tres xornadas anteriores e puxo en valor que un día máis se caeu a emisión de 'O Termómetro', o programa que sinalan como exemplo desta externalización.

APOIO DE BESTEIRO E CC.OO.

A concentración mantida este luns polos traballadores do ente público contou coa presenza do xefe de filas do PSdeG, José Ramón Gómez Besteiro, e a secretaria xeral de CC.OO., Amelia Pérez. En primeiro lugar, Besteiro sostivo que a externalización supón "un novo ataque á independencia e á calidade dos medios públicos" e trasladou o apoio dos socialistas galegos ás reivindicacións do Comité Intercentros.

O responsable socialista, que reivindicou a independencia e transparencia da Radio Galega e da Televisión de Galicia, criticou que o presidente da Xunta, Alfonso Rueda, presentase un anteproxecto de lei que blinda a "mordaza" nos medios públicos galegos e supón unha "involución de máis de 30 anos" ao "penalizar a liberdade de información". Ademais, aludiu ao procedemento lexislativo que os socialistas galegos trasladaron a Europa ao considerar que hai risco de que se infrinxan as directrices comunitarias polo aumento do control do goberno.

Concentración de traballadores en folga da CRTVG | Fonte: COMITÉ INTERCENTROS

Todo iso, sinalou, mentres "se suprime a necesidade dunha maioría reforzada no Parlamento de Galicia para a elección da dirección xeral e do consello de administración, ademais de ir en contra da "cultura galega" ao deixar no aire a defensa e promoción do idioma nun momento no que o IGE "sinalou que hoxe se fala menos galego que castelán".

Pola súa banda, a responsable de CC.OO. sostivo que o "cuarto poder" non pode ser a "correa de transmisión" dun partido político, senón que, ao contrario, debe de ser "quen controle á política". "Levades moitos anos soportando as manipulacións e as presións nesta casa. Sabemos que as folgas non son fáciles, a vosa non vai ser fácil e non vai ser de curto percorrido, de aí de transmitirvos o apoio de CC.OO. para todo o que necesitedes", trasladou Amelia Pérez aos traballadores.

A CRTVG CIFRA NUN 31,7 % O SEGUIMENTO

Pola súa banda, fontes da CRTVG consultadas por Europa Press apuntaron que o seguimento se situou no 31,7 %, polo que destacaron que "case o 70% dos traballadores seguen sen apoiar" os paros parciais na segunda semana dunha folga que "non está apoiada por todo os sindicatos da corporación".

Ademais, estas fontes precisaron que 'O Termómetro' se emitiu todos os días desde a súa posta en marcha (este luns empezou ás 13.11 horas) e que o programa alcanzou o pasado martes o liderado da súa franxa horaria en Galicia. "O Termómetro é unha coprodución da TVG con dúas empresas do sector audiovisual galego e segue exactamente o mesmo esquema que se utiliza na actualidade en TVE e no resto de canles autonómicas", sinala a CRTVG.

Ademais, a CRTVG apuntou que respecta pero lamenta que o Comité Intercentros da CRTVG, "sen ningunha base legal que soporte a cancelación do espazo, tente impedir en Galicia esta colaboración que si existe no resto de España e cuxa consecuencia sería a perda de traballos no sector audiovisual galego". "Máxime cando a realización deste programa non ten ningunha afectación sobre o cadro de persoal da CRTVG, que terá ao 100 % dos traballadores fixos a finais de 2024", apuntou.