60 anos máis de ENCE na Ría de Pontevedra
O Estado concede a prórroga á celulosa, que promete máis de 60 millóns de investimento en melloras ambientais e de produtividade.
Por Galicia Confidencial | Pontevedra | 25/01/2016 | Actualizada ás 14:33
O Ministerio de Agricultura, Alimentación e Medio Ambiente outorgou a Ence - Enerxía e Celulosa a prórroga da concesión de ocupación dos terreos nos que se sitúa o seu centro de operacións de Pontevedra. A prórroga concédese por 60 anos, cun prazo adicional por encima dos 50 anos.
Promesas de investimento
Segundo ENCE, o Estado xustifica a decisión polo “forte compromiso de Ence en Pontevedra cun investimento de 61 millóns de euros”. Así, o ENCE prometeu gastar 30,2 millóns na mellora da eficiencia da fábrica, o que “permitirá un crecemento en celulosa e enerxía renovable”. Ademais, a empresa díxolle a Administración que investirá 15 millóns na instalación dun novo ciclo da auga, que faría posible recuperar gran parte da auga do proceso e minimizar o volume do efluente.
A compañía promete tamén “melloras ambientais”, concretamente na eliminación de cheiros, de ruídos e de vapores, así como para “garantir a fiabilidade ambiental máis aló das súas obrigacións legais” e mellorar a integración paisaxística.
División de opinións en Pontevedra
A presencia da fábrica de celulosa na Ría é un aspecto moi polémico na comarca, onde existe hai décadas un activo tecido social contrario á industria. Un dos colectivos máis críticos, Salvemos Pontevedra, mantén aberto un preito no que reclama que o Estado abra e execute o expediente para facer caducar a concesión na costa, agora prorrogada.
O asunto tamén é moi relevante a nivel político, pois o PP prometeu a nivel galego que buscaría outra situación para a fábrica cerca de Pontevedra, mentres os conservadores e varios sidnicatos a nivel local sempre estiveron a prol da súa permanencia na praia de Placeres. Polo contrario, os partidos de esquerda levan anos apoiando as mobilizacións de colectivos como a Asociación en Defensa da Ría contra a celulosa. Este asociación argumenta que se ceden "terreos de titularidade pública a unha empresa privada que, ademáis, incumpre a legalidade".
"Ence non vai a defraudar a Pontevedra e a súa bisbarra, e comprométese a traballar coa máxima responsabilidade e co maior rigor para seguir xerando riqueza e emprego, así coma para contribuír á calidade de vida dos ciudadáns de Pontevedra, coa esperanza de facerse acreedora de apoio á súa actividade e permanencia por parte de todos os pontevedreses e pontevedresas", remata o comunicado publicado hai uns minutos.
A decisión chega cun goberno en funcións, que en teoría só pode abordar asuntos de trámite. No Consello de Administración de ENCE participan varios ex-altos cargos de administracións dirixidas polo PP, como Isabel Tocino, ex-ministra de Medio Ambiente, e Carlos de Álamo, ex-conselleiro tamén de Medio Ambiente na era Fraga.
